Чурапчы улууһун Төлөй нэһилиэгин туһунан чахчы докумуоннарга 1769 сыллаахтан биллэр.
edersaas.ru
Төлөй биир сытыы-хотуу киһитэ Уот Сирэй Кыыдаала куоракка киирэн сүрэхтэнэн, Федот диэн ааттанан, Борисов диэн араспаанньаланан тахсан, Үһүс Хатылы нэһилиэгиттэн Төлөйү араартаран, туспа нэһилиэк быһыытынан тэрийтэрбит уонна онно кинээһинэн анаммыт. Төлөй дьоно бастакы кинээстэрин аатын үйэтитэн, хас да сыллааҕыта нэһилиэктэригэр «Кыыдаала оонньуулара» диэн спортивнай күрэхтэһиини олохтообуттара.
Чурапчыга атырдьах ыйын 16 күнүгэр киэн туттар биир дойдулаахтара, Федерация Сэбиэтин аграрнай бэлиитикэҕэ уонна айылҕаны туһаныыга кэмитиэтин бэрэссэдээтэлин солбуйааччы Егор Борисов 65 сааһын туолбут үбүлүөйүгэр анаммыт тэрээһиҥҥэ төлөйдөр «Кыыдаала оонньууларын» улуус таһымыгар таһаардылар. Манна хас нэһилиэк ахсыттан чулуу спортсменнар, улуус уонна өрөспүүбүлүкэ күрэхтэһиилээхтэрин кыайыылаахтара, призердара, барыта 17 киһи күөн көрүстэ. Кинилэр кэккэлэригэр Петр Старостин, Павел Друзьянов, Алексей Протодьяконов, Ньургун Пестряков, Григорий Барашков, Семен Аммосов, Данил Николаев уо.д.а. спорт биэс көрүҥэр: хапсаҕайга, 60 миэтэрэҕэ диэри сыарҕаны соhууга, тутум эргииргэ бэрэбинэни ыраахха илдьиигэ уонна 400 миэтэрэҕэ кыыһы эккирэтиигэ күрэхтэстилэр.
Уол оҕо уйана-хатана биллэр сытыы киирсиилээх күрэхтэһиигэ Петр Старостин (Одьулуун) чөмпүйүөннээн, «Анаабыр алмаастара» хампаанньа олохтообут 300 тыһ. солк. харчылаах сертификатынан наҕараадаланна, иккис миэстэни ылбыт Семен Аммосов (Сылаҥ) «Туймаада-нефть» хампаанньа олохтообут 200 тыһ. солк., үһүс миэстэҕэ тиксибит Павел Друзьянов «Сахатранснефтегаз» хампаанньа олохтообут 100 тыһ. солк. сертификаттарынан бэлиэтэннилэр.
Раиса Сибирякова, «Саха сирэ» хаһыат, edersaas.ru
Екатерина Захарова хаартыскаҕа түһэриилэрэ.