Саха сиригэр коронавируснай инфекция тарҕаныыта намыраан, диспансеризацияҕа былааннаах үлэ саҕаланна. Улуустарга ордук сайыҥҥы өттүгэр суола-ииһэ суох, кытыы сирдэргэ болҕомто ууруллар. Онон мобильнай мэдиссиинэ комплекстардаах анал “КАМАЗ” массыыналарынан айанныыллар диэн доруоубйа харыстабылын министиэристибэтин пресс-сулууспата иһитиннэрэр.
Бу маннык комплекстар “Доруобуйа харыстабыла” национальнай бырайыак мэдиссиинэ бастакы сүһүөх салаатын саҥардыы бырагырааматын чэрчитинэн, өрөспүүбүлүкэҕэ кэлбиттэрэ. Суола-ииһэ суох сиргэ иҥнибэккэ айанныыр абыраллаах тиэхиникэ. Туох баар наадалаах анал тэрилинэн хааччыллыбыт буолан, олус табыгастаах.
Чурапчыга улуустааҕы киин балыыһа үлэһиттэрэ ыраах сытар кыра сэлиэнньэлэргэ баран үлэлээтилэр. Биригээдэҕэ окулист, онколог, акушер-гинеколог, УЗИ исписэлииһэ, терапевт быраастар дьону көрдүлэр-иһиттилэр. 27 киһиэхэ араас ыарыыны буланнар, салгыы чинчийиигэ ыыттылар.
Чахчыта, ыраах дэриэбинэлэргэ маннык исписэлиистэр суохтар, дьон олорон хаалан, ыарыытын баалатан кэбиһэрэ баар суол. Ыарыыны төһөнөн эрдэ булан эмтэнэҕин да, үтүөрүү бырыһыана соччонон үрдүк буолара өйдөнөр.
Ону тэҥэ, миэдиктэр нэһилиэнньэҕэ “Сэллиги сэрэтии” диэн тиэмэҕэ лиэксийэ аахтылар.
Ангелина Васильева, “Саха сирэ” хаһыат, edersaas.ru