Быйыл Ил Дархаммыт Айсен Николаев Чэбдигирии сылын биллэрбитэ. Өрөспүүбүлүкэ дьоно-сэргэтэ чэгиэн доруобуйалаах буолалларын туһугар аны “Саха Өрөспүүбүлүкэтигэр уопсастыба бүттүүн доруобуйатын бөҕөргөтүү уонна доруобуйа харыстабылын тиһигин сайыннарыы стратегическай хайысхаларын туһунан” ыйаахха илии батаата.
Онон өрөспүүбүлүкэҕэ Чэбдигирии уон сыла биллэрилиннэ. Бу туһунан Аллайыаха улууһун Быйаҥныыр баһылыга Анастасия Большакова санаатын төлөпүөнүнэн үллэһиннэ:
— Ил Дархаммыт Айсен Николаев бу саҥа ыйааҕын Арктика олохтоохторугар олус суолталаах буолуо дии саныыбын. Мин салайар Быйаҥныыр нэһилиэгим улуус кииниттэн 234 км тэйиччи сытар, уустук суоллаах-иистээх. Хата, биэлсэрбит баар буолан, абыранныбыт. Биллэрин курдук, үгүс хоту кыра нэһилиэктэргэ биэлсэр пууннара бааллар. Манна сүрүн кыһалҕанан биэлсэри булуу буолааччы. Ыйаах күүһүгэр киирэн үлэлээтэҕинэ, кытыы биэлсэр пууннарын биэлсэринэн хааччыйыы тупсуо диэн эрэнэбин. Үөрэҕи бүтэрбит оҕолору сэбиэскэй кэмнээҕи курдук анаан ыытыы (распределение) оҥоруутун сөргүтэллэрэ буоллар, кыһалҕа быһаарыллыа этэ. Улуустар киин балыыһаларыгар үчүгэй исписэлиис быраастар үлэлии кэлэллэригэр нэһилиэнньэ баҕарар. Билигин ыалдьар дьон хотуттан куоракка көтөллөрө сыана да өттүнэн олус ыарахан. Онон Чэбдигирии уон сыла биллэриллибитин биир бэйэм сэргээтим. Ыйаахха тутуллуохтаах испииһэккэ киирбит балыыһалар үлэҕэ да киирэллэрэ үчүгэй буолуо этэ.
Наука өттө эмиэ сайдыахтаах диэбит. Хоту нэһилиэктэр доруобуйаларын чинчийии барыаҕа дии саныыбын.
Бэлэмнээтэ Женни Стрюкова.
Хаартыска: А.Большакова ыыппыта