Олунньу 28 күнүгэр Ил Дархан Айсен Николаев KAZ Minerals хампаанньа дириэктэрдэрин сэбиэтин бэрэссэдээтэлэ Олег Новальчуктуун уонна бу хампаанньа Арассыыйаҕа дириэктэрэ Георгий Фотинныын көрсөн, Саха сиригэр бырайыактары үлэлэтии туһунан кэпсэттилэр.
KAZ Minerals хампаанньа 2019 сыллаахха Чукотка Билибинскэй оройуонугар Баимскайдааҕы алтаны хостуур сири атыыласпыта. Бу сир Саха сирин кытары ыаллаһа сытар. Онон бу бырайыак чугастааҕы сирдэргэ эмиэ сайдар кыаҕы биэрэр.
KAZ Minerals – үс дойдуга (Илиҥҥи Казахстаҥҥа, Кыргызстаҥҥа уонна Арассыыйаҕа) сир баайын хостуур аан дойдутааҕы бөдөҥ хампаанньа. Оттон Чукоткаҕа Баимскайдааҕы рудник – аан дойду үрдүнэн алтаны хостооһуҥҥа биир саамай бөдөҥ бырайыак буолар. Онно киирэр Песчанка диэн сир саппааһа – 3,73 мөлүйүөн туонна алтан, 230 туонна кыһыл көмүс буолара сабаҕаланар.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru