Саха сирэ «WorldSkills» күрэхтэһиигэ кыттааччытын ахсаанынан ТОП-15 иһигэр киирдэ
СӨ Үөрэҕин уонна наукатын миниистирин солбуйааччы Андрей Попов иһитиннэрбитинэн, Саха сирэ ВорлдСкиллс чөмпүйэнээккэ кыттыытынан ТОП-15 иһигэр киирдэ.
СӨ бырабыыталыстыбатын бэрэссэдээтэлин эбээһинэһин толорооччу Владимир Солодов бэҕэһээ “WorldSkills” национальнай чөмпүйэнээт финалын призердарын уонна кыттааччыларын кытта көрүстэ, махтал суруктары туттарда, Саха сирин аатын дьоһуннаахтык көмүскээбиттэрин бэлиэтээтэ.
Оттон СӨ Үөрэҕин уонна наукатын миниистирин солбуйааччы Андрей Попов Саха сирэ чөмпүйэнээккэ саамай элбэх кыттааччылаах хамаандалартан биирдэстэрэ диэн эттэ. “Бу күннэргэ тэрийээччилэр бүтэһиктээх түмүгү таһаардылар. Саха сирэ кыттааччытын ахсаанынан 15 иһигэр киирдэ. Чөмпүйэнээккэ биһиги хамаандабыт икки үрүҥ көмүс, үс боруонса мэтээллэри уонна профессионализм иһин медальону ылары ситистэ”, — диэн иһитиннэрдэ.
Людмила ПОПОВА, “Саха сирэ” хаһыат, edersaas.ru
Андрей СОРОКИН (СИА) хаартыскаҕа түһэриилэрэ.