Кыталык көмүскэлэ докумуонунан бигэргэннэ

Ааптар: 
Бөлөххө киир:

«Кыталык арыыта»  национальнай паарканы салайар «Врангель Арыыта» айылҕа судаарыстыбаннай заповеднига уонна Кытай Өрөспүүбүлүкэтин «Поянг Күөлэ» айылҕа национальнай заповеднигын салалталара  бииргэ үлэлээһин меморандумугар илии баттастылар.

Өрүттэр бу докумуонунан кыталык уонна атын көтөрдөр Кытайга уонна Арассыйа сиригэр-уотугар ууһулларыгар тустаах усулуобуйаны олохтуур хайысхалары тобуллулар. Онон «Кыталык» национальнай паарка уонна «Поянг Күөлэ» национальнай айылҕа заповеднига Илин Сибиирдээҕи-австралоазийскай көтөрдөр ааһар куйаар суоллара араас дойдулары биир ситимниир «эдьиийдии-балыстыы» сирдэринэн буолуохтара.

Суолталаах докумуоҥҥа «Врангель арыыта» заповедник дириэктэрэ  Александр Грузев уонна Кытай Өрөспүүбүлүкэтин «Поянг Күөлэ» айылҕа национальнай заповеднигын дириэктэрэ  Ксю Живэнь  илии баттаатылар.

«Врангель арыыта» заповедник дириэктэрэ  Александр Грузев бэлиэтээбитинэн, төрүүр-ууһуур көтөрдөрү харыстааһыҥҥа, холбоһуктаах чинчийиини оҥорууга, араас тустаах матырыйаалынан хааччыйыыга уопут атастаһыыга докумуон суолтата сүҥкэн.

Федеральнай таһымҥа маннык меморандумҥа аан бастаан илии баттыыбыт. Кыталык уонна да атын көтөр олорор, ууһуур сирдэрин чинчийэр уонна чөлүгэр түһэрэр үлэни салгыы ыытыахпыт, — диэн Александр Грузев санаатын тиэртэ.

— «Поянг Күөлэ» Кытайга биир саамай айылҕа суолталаах национальнай заповеднига. Бу күөлгэ тыһыынчанан араас көтөр кыстыы көтөн кэлэр. Онон кыталык курдук мааны көтөрү харыстааһыҥҥа бииргэ үлэлээһиҥҥэ дьоһуннаах хардыы оҥоһулунна, —  диэн бэлиэтээтэ Ксю Живэнь.

«Кыталык» национальнай паарка Аллайыаха оройуонугар «Экология» национальнай бырайыак чэрчитинэн 2019 с. тэриллибитэ уонна «Врангель арыыта» айылҕа судаарыстыбаннай заповедникка бэриллибитэ. 

Елена ПОТОЦКАЯ, “Саха сирэ” хаһыат, edersaas.ru

Хаартыска — ааптар түһэриитэ уонна Андрей Сорокин (СИА).

+1
0
+1
0
+1
0
+1
0
+1
0
+1
0
+1
0