Ыам ыйыгар Арассыыйа Кытайга 8,42 мөл туонна ньиэби атыылаабыт, бу ааспыт сыл ыам ыйынааҕы туругунан, 55 %-нан элбэх буолар.
Өссө биир болҕомтону тардар түгэн. Арассыыйа бу дойдуга бастакытын Саудовскай Аравияттан элбэх ньиэби тиксэрбит. Арабтар ити ыйга 7,82 мөл туоннаны атыылаабыттар. Арассыыйа ньиэбэ муоранан уонна «Илин Сибиир — Тиихэй акыйаан» сүүнэ утаҕынан Кытай Sinopec уонна Zhenhua Oil диэн сүрүн судаарыстыбыннай тэрилтэлэргэ тиэрдиллэр.
Арҕааҥҥы дойдулар сааҥсыйаларыттан сылтаан ньиэби көҥүл ырыынакка атыылыырга кэккэ саҥа уустуктар үөскээтилэр. Ол эрээри, саҥа ырыынагы булууга ситиһиилэр бааллар. Ньиэп уопсай сыаната үрдээн, Арассыыйа дохуотугар эбии үп киириитэ улааппыт. Нуучча сириттэн киирэр ньиэби Кытай быдан ордорбут, онон Бразилияттан атыылаһарын 19 % кыччаппыт.