Кытайга коронавирус ыарыыта үмүрүйэн эрэр. Билигин балыыһаларга 1 тыһыынча кэриҥэ ыарыһах баара биллэр.
edersaas.ru
Ыалдьыбыт дьон ахсааныттан 93,2 %-на үтүөрбүт, 5,59 %-на өлбүт. Ону КНР доруобуйа харыстабылын боппуруостарыгар судаарыстыбаннай кэмитиэтэ дакылааттаата.
Кэнники көрдөрүүлэринэн, Кытайга ыарыыга ылларбыт дьон ахсаана 82 798 тиийбит, олортон 77 207 киһи үтүөрбүт.
Ыарыы турбут Хубэй провинциятын аахпатахха, Кытай үрдүнэн ыарыы туруоҕуттан 14 670 киһи сутуллуута учуоттаммыт, олортон 120 киһитэ өрүттүбэтэх, онон өлүү бырыһыана 0,81% тэҥнэспит. Саамай улаханнык эмсэҕэлээбит Хубэй провинцияҕа 68 128 киһи сутуллубутуттан 4512-тэ өлбүт, онон коронавирустан өлүү бырыһыана 6,62% тэҥнэстэ.
КНР доруобуйа харыстабылын боппуруостарыгар судаарыстыбаннай кэмитиэтэ кулун тутар 29 күнүгэр “дойдуга ыарыы тэнийиитэ тохтоото” диэн биллэрбитэ. Билигин Кытай былаастара ыарыыны тастан киллэрбэт туһугар үлэлииллэр.
Егор Карпов бэлэмнээтэ
Хаартыска https://eadaily.com