Арассыыйа билигин “МИР” каартаны киллэриигэ Азербайджаны, Кытайы уонна Египеты кытары үлэлэһэ сылдьар. Билигин бу каартаны 11 дойдуга туһаныахха сөп.
Кулун тутартан саҕалаан арҕааҥҥы дойдулар араас хааччаҕы киллэрбиттэрин түмүгэр, билигин Арассыыйа электроннай каарталара үгүс дойдуга үлэлээбэттэр. Билиҥҥитэ “МИР” систиэмэнэн үлэлиир каартаны Турцияҕа, Вьетнамҥа, Соҕуруу Кореяҕа, Арменияҕа, Узбекистаҥҥа, Беларуссияҕа, Кыргызстаҥҥа, Таджикистаҥҥа, Казахстаҥҥа, Соҕуруу Осетияҕа, Абхазияҕа туһаныахха сөп.
Тас дойдулар дьыалаларыгар министиири солбуйааччы Александр Панкин иһитиннэрбитинэн, Азербайджаны, Кытайы, Египеты таһынан Бахрейн, Индия, Куба, Мьянма, Нигерия, Таиланд, о.д.а. судаарыстыбалары кытары үлэ бара турар. “Норуоттар икки ардыларынааҕы улахан төлөбүр систиэмэтиттэн Арассыыйаны таһааран кэбиһии түмүгэр “МИР” систиэмэни атын дойдуларга киллэрии күүскэ бара турар. Бу хайысхаҕа үлэ бара турар”, – диэн иһитиннэрэр кини. Санатан эттэххэ, Арассыыйа “МИР” систиэмэни 2014 сыллаахха киллэрбитэ.
Аграфена КУЗЬМИНА