Санкт-Петербург куоракка бу ый саҥатыгар ювелирдар норуоттар икки ардыларынааҕы ХХV «Экспофорумнара» буолан ааста. Онно сенсационнай быһылаан таҕыста.
Вера МАКАРОВА, «Саха сирэ» хаһыат, https://edersaas.ru/
Ол туһунан сонуннары киэҥник тарҕатар федеральнай ситимнэр иһитиннэрдилэр. Ол курдук, олунньу 1 күнүгэр бу куоракка турист быһыытынан кэлбит Кытай гражданнара — дьахтардаах эр киһи — бу форумҥа «Бриллианты Якутии» стендэтиттэн 3.01 карат ыйааһыннаах «D/VS1» бриллианы уоран баран, ол оннугар көннөрү тааһы уурбуттар. Бу бриллиант сыаната 6 мөл. 300 тыһ. солк.!
Дьолго, бриллианы атын тааска уларыппыттара түргэнник биллэн, видеокамера көмөтүнэн, полицейскайдар уорбаланааччылары сол күн туппуттар — 30 саастаах китаянканы «Экспофорумтан» чугас сиртэн, онтон 38 саастаах эр киһини хас да чаас буолан баран, Пулково аэропортан, Пекиҥҥэ көтөөрү сырыттаҕына. Форумтан тахсаат, суолларын бутуйан буолуо, икки аҥы барбыттар да онтулара көмөлөспөтөх.
Бу чахчынан РФ Холуобунай кодексатын 158-с ыст. 4-с чааһынан дьыала тэриллибит.
Оттон ыарахан сыаналаах күндү тааспыт ханна баарый?
Сабаҕалааһын быһыытынан, өссө стендэ аттыгар туран, эр киһи тааһы ыйыстан кэбиспит. Тоҕо диэтэр, оперативниктар уорбаланааччылар малларын чүүччэйбиттэр да, булбатахтар. Ол иһин эр киһини хонбуойдааннар, чугастааҕы балыыһаҕа илдьибиттэр. Ренгент уонна УЗИ пациент куртаҕар туора эттик баарын чуолкайдык көрдөрбөт буолан, полицейскайдар уонна медиктэр бриллиант «естественнэй» суолунан тахсарын кэтэһэллэр.
Онон, билигин эр киһи балыыһаҕа сытар, дьахтар Силиэстийэлиир изоляторга хаайыллыбыт.