Аҕыйах хонуктааҕыта Владимир Путин Ил Дархан сүбэһитэ Андрей Борисовы «За заслуги перед Отечеством» IV истиэпэннээх уордьанынан наҕараадалыыр туһунан ыйааҕа тахсыбыта. Бу күннэргэ Андрей Саввиһы үрдүк наҕараадатынан Куньцюй тыйаатырын кэлэктиибэ уонна “Лао-цзы” Бүтүн Кытайдааҕы уопсастыба бэрэссэдээтэлэ Чжан Юньчэн эҕэрдэлээтилэр.
edersaas.ru
“Лао-цзы” уопсастыба эҕэрдэтэ: “Биһиги, эн Кытайга баар бырааттыы доҕотторуҥ, үрдүк наҕарааданы ылбыккын истэн олус үөрдүбүт уонна киэн тутуннубут. Эйигин истиҥник эҕэрдэлиибит уонна түбүктээх үлэҕэр ытыктабылбытын өссө төгүл биллэрэбит! Инникитин да саҥа шедеврдэри айан, сөҕүмэр ситиһиилэриҥ үөрдэ туруохтара диэн эрэнэбит” диэн тыллардаах.
Оттон Куньцюй тыйаатырын дириэктэрэ, кытай драматурдарын ассоциациятын бэрэссэдээтэлэ Ян Фэн маннык тыллардаах эҕэрдэтин ыыппыт: “...Биһиги Арассыыйаҕа Эн курдук доҕордоохпутунан киэн туттабыт. Инникитин бииргэ үлэлэһэр ситиһиилээх бырайыактарбыт баар буолуохтара диэн эрэнэбит. Өссө үрдүк ситиһиилэри баҕарабыт!”.
Бу тыллар кытайдар Андрей Борисов айар үлэтин олус үрдүктүк сыаналыылларын, ытыктыылларын, билинэллэрин көрдөрөллөр.
Санатар буоллахха, Андрей Борисов Кытай искусствотын бэрэстэбиитэллэрин кытта айымньылаах сыһыаннара саҕаламмыта уонча сыл буолла. Ол түмүгэр 2015 сыл ахсынньытыгар Пекиҥҥэ Саха сирин култууратын күннэрэ ыытыллыбыттара. Бу норуоттар икки ардыларынааҕы бырайыак Куньцюй кытай оператын тыйаатырын уонна Олоҥхо тыйаатырын бииргэ үлэлэһиилэрин түмүгэр үөскээбитэ. Пекиҥҥэ Куньцюй тыйаатырын артыыстара «Туйаарыма Куо» испэктээкили, Олоҥхо тыйаатыра Тан Сянь-Цзу «Пионовая беседка» драматын көрдөрбүттэрэ. Бу курдук испэктээкиллэри хардарыта туруорсуу аан дойдуга өссө буола илигэ. Ону тэҥэ Саха тыйаатыра “Ойуун түүлэ”, Опера, балет тыйаатыра “Князь Игорь” испэктээкиллэрин туруорбуттара. Бу тэрээһин чэрчитинэн, Николай Лугинов «Хуннские повести» романын сүрэхтээбиттэрэ, “Сааскы кэм”, “Снайпер саха” киинэлэри көрдөрбүттэрэ, саха худуоһунньуктарын быыстапкалара, уо.д.а. буолбуттара. Соторутааҕыта Андрей Борисов уонна Николай Лугинов ыҥырыыларынан, “Лао-цзы” уопсастыба чилиэннэрэ, кытай худуоһунньуктара, каллиграфтара Дьокуускайга кэлэн, быыстапкаларын туруорбуттара. Онон култууралар хардарыта алтыһыылара, бииргэ үлэлээһин, норуоттар доҕордоһуулара салҕанар.
Ангелина Васильева, “Саха сирэ” хаһыат, edersaas.ru
Хаартыскаҕа: 1. Андрей Борисов уонна “Лао-цзы” Бүтүн Кытайдааҕы уопсастыба бэрэссэдээтэлэ Чжань Юнь Чэн. 2. Кытайдар «Туйаарыма Куо» операны туруоруулара.