Кытай ыччата былырыыҥҥы сириттэн Өймөкөөҥҥө эмиэ бэлисипиэтинэн айаҥҥа турунна!
Бу күннэргэ былырыын баччаларга Тымныы полюһугар бэлисипиэтинэн айанныы сатаан баран, Хаандыгаҕа тиийэн, көлөтө алдьанан төннүбүт Кытай экстремал туриһа Ча Эрдаан эмиэ Өймөкөөҥҥө айаҥҥа турунна.
edersaas.ru
Ча Эрдааны быйыл эмиэ Сунтаар ыччата Александр Архипов арыаллаан кэлбит. Былырыыҥҥы курдук уолаттар Дьокуускайтан ыла суоллара арахсыбыт. Уоппускатыгар кэлбит Александр дойдутугар Сунтаарга айаннаабыт, оттон Ча Эрдаан Хаандыгаҕа диэри массыынанан ыраах айаҥҥа туруммут. Бу күннэргэ кини Хаандыгаҕа тиийэн, айанын тохтоппут сириттэн бэлиспиэтинэн Өймөкөөннөөтө.
Александр Архипов Ча Эрдааны кытта суотабайынан билсэ олорор. Киһитэ ханна сибээстээх сиргэ таҕыста да, бэйэтэ көрөн, төлөпүөнүгэр эрийэр.
— Ча Эрдаан дьиҥэр табаарыһынаан иккиэ буолан кэлиэхтээхтэр эбит. Онуоха киһитэ ханна эрэ интернеккэ Өймөкөөҥҥө бөрө элбэҕин туһунан ааҕан баран, куттанан аккаастаан кэбиспит. Ча Эрдаан Дьокуускайга олунньу 1 күнүгэр көтөн кэлбитэ. Онтон иккиэн маҕаһыыннары кэрийбиппит. Таҥаһа чарааһыттан хаатыҥкалаах маҕаһыыннарга илдьэн, көрдөрө сатаабытым да, сөбүлээбэтэҕэ. Бэлисипиэти бачыыҥкалаах тэбэрэ быдан ордук үһү. «Хаатыҥка мэһэйдиэҕэ, модорооно бэрт», — диэн кыккыраччы аккаастаммыта. Саатар айаннаабат кэмигэр кэтиэ эбитэ буолуо да, ылымматаҕа. Соно, үтүлүгэ чараас баҕайы — былырыыҥҥы таҥаһа. Онно холоотоххо, француз Ив Шалуан олохтоохтук оҥостон, таҥас тиктэрэн кэлбит эбит. Мин киһим балаакката да чараас, аһа-үөлэ да кэмчи. Дьокуускайтан хас да паачка оргуйбут ууга түргэнник буһар хааһы ылбыта уонна дойдутуттан эмиэ оргуйбут ууга уктун да ас буолар, кураанах аһылыктаах этэ, — диэн кэпсиир Александр. Сунтаар ыччата миэхэ батсаабынан доҕорун атаараары олорон, хаартыскаҕа түспүттэрин ыыппыта.
— Хаандыгаттан Теплай Ключка тиийэн эрэрэ буолуо. Киэһэрдэҕинэ аара суол аттыгар балааккаҕа хонуоҕа. Күҥҥэ 40 км барар, — диэн бэлиэтээбитэ Александр.
Киэһэ хойут Александр Архипов табаарыһа Ча Эрдаан ыыппыт хаартыскаларын миэхэ батсаапка ыыппыта. Экстремал-турист хонуктуу тохтообут.
Сунтаарга интернет мөлтөх буолан, батсаап эмиэ бытаан. Хаартыскаҕа көстөрүнэн, кытай ыччата олох хаарга хоно, астана сылдьар.
Уол улаханнык тоҥмут сибикитэ биллибэт. Бу күннэргэ Өймөкөөҥҥө 20-тэн тахса кыраадыс тымныы. Онон кытай ыччата айанныырыгар куттал суох
Өймөкөөннөр былырыҥҥыттан Тымныы полюһугар бэлисиэпитинэн айанныы сатыыр кытай туриһын көрүөхтэрин баҕараллара чахчы. Француз Ив Шалуан Өймөкөөҥҥө массыынанан тиийэн, айанныахтаах суолун-ииһин эрдэттэн үөрэппит буоллаҕына, кытай экстремала эрэнэрэ эрэ — санаатын күүһэ. Онон биир төгүрүк сыл буолан баран, туруоруммут соругун анаан толоро төннүбүт ыччакка уустук айана табылларыгар баҕарыаҕыҥ!
Елена ПОТОЦКАЯ, «Саха сирэ», edersaas.ru
Хаартыска — Александр Архипов архыыбыттан.