Кытай туриһа Нуораҕанаҕа “Доширак” сиэн ааста

Ааптар: 
Бөлөххө киир:

Өймөкөөҥҥө айаннаан иһэр кытай туриһа сүппүтүн туһунан иһитиннэрии бүтүн өрөспүүбүлүкэ дьонун долгутта.

Елена ПОТОЦКАЯ “Саха сирэ”, edersaas.ru

Матырыйаалым тахсаатын кытта, тута араас комментарий батсаап нөҥүө тиийэн кэллэ: “Онно тугу көрдөөн барда? Сүттүүн…”; “Эрэйдээҕиэ, ханна эрэ тиийдэ буолла, ким эрэ оҕото буолаахтыа. Эдэрэ да бэрт эбит”; “Кытай спезнаһыттан Тымныы полюһун тымныытыгар хайдах тулуйуохха сөбүн бэрэбиэркэлии ыыппыттара буолуо. Биһиги буоллаҕына, дьиикэй киһи курдук көрөбүт…”. Ол эрэ буолуо дуо, долгуйбут дьону уоскутаары онтон-мантан кинини ким ханна көрбүтүн туһунан социальнай ситимнэргэ иһитиннэрэн иһэллэр.

Ол курдук, ватсаптан эбиэт саҕана Тааттаттан куоракка айаннаан иһэн, Нуораҕана суолугар Мария Боппосова кэргэнинээн бэлэсипиэттээх кытай туриһын көрбүтүн туһунан билбитим.

— Социальнай ситимнэртэн истибит буолан, соһуйбатахпыт. Бэлэсипиэтин кэннигэр олус элбэх маллаах этэ. Таҥаһын чараас баҕайы курдук көрбүтүм. Тааттаҕа куораттааҕар тымныы этэ. Өймөкөөҥҥө чугаһаатаҕына өссө тымныйан иһиэ дии, — диэн санаатын үллэстэр сэһэргэһээччим.

Оттон суоппар Петр Аргунов кытай ыччатын Төҥүлү-Бэстээх икки ардыгар күнүс айаннаан иһэн көрбүт. Эмиэ батсаапка аахпыт буолан, ааһан иһэн билэр киһитин көрбүттүү үөрбүт.

Сирэйин көстүбэт гына саалынан тууна бааммыт этэ. Мантан саас итинник бэлэсипиэттээх дьон айан суолугар нэдиэлэ аайы көстүөхтэрэ. Онон кинилэргэ кыһанааччым суох. Ити кытай киһитэ батсаап дьоруойа буолбутуттан эрэ интэриэһиргээбитим, — диэн кэпсиир суоппар.

Онтон инстаграмҥа Нуораҕана кыргыттара турист маҕаһыыҥҥа киирэн кинилэри кытта кэпсэппитин туһунан суруйбуттар: “Кэлэн аччыктаатым диэн илиитинэн көрдөрбүтэ. Онно “Доширак” уонна бэрэски сиэппиппит. Үөрбүтэ аҕай...”. Кыргыттарга махтаммыт кытай туриһа бэйэтин бэлэҕин биэрбит уонна кинилэрдиин хаартыскаҕа түспүт.

Онон уолбут Өймөкөөннүүр суолу сөпкө тутуһан иһэр эбит. Бүтэһигин кытай туриһын суоппардар “Халыма” трассатын 105 км көрсүбүттэрин хаартыскаҕа түһэрэн ыыппыттар. Социальнай ситимнэр көмөлөрүнэн кинини кытта хас хонук Тымныы полюһугар “айаннаан” тиийэрбит биллибэт. Салгыы маннык билиһиннэрэн иһиэхпит.

Елена Потоцкая, «Саха сирэ» хаhыат, edersaas.ru

+1
0
+1
0
+1
0
+1
0
+1
0
+1
0
+1
0