Бэс ыйын 26 күнүгэр Аллайыаха туундаратыгар кыталыктары үөрэтэ сылдьар экспедиция салайааччытыттан түүн тыллабыр киирбитэ. Били, Дьокуускайга быыстапката буола турар, Кытайтан кэлбит суруналыыс, эко-хаартыскаҕа түһэрээччи Чжоу Хайянь — ЙаЙаны уонна профессоры кытта кэлбит устудьуон кыыс сыыһа үктээн, атаҕын эчэппитин туһунан.
edersaas.ru, Женни Стрюкова
Онуоха Аллайыаха улууһунааҕы айылҕа харыстабылын иниспиэктэрдэрэ сарсыардаттан хомунан, наһыылка ылан, мотуордаах оҥочонон кыысчааны бөһүөлэккэ аҕалаары айаннаабыттара. Иниспиэктэрдэр Сергей Яныгин уонна Иван Рожин ити Дьолоон үрэх кытылыттан 10-ча км тэйиччи баар учуонайдар баазаларыгар дулҕа, силээн быыһынан сатыы айаннаан тиийиэхтээхтэрэ. Хайдаҕын да иһин, кыыһы кытылга оҥочоҕо диэри наһыылканан аҕаларга соруммуттара.
Хата, кинилэр дьоллоругар диэххэ дуу, быыһааччылара иһэллэрин көрөн малын хомуна сырыттаҕына кыыс атаҕа аматыйбыт. Оҕо эрдэҕинэ итинник эмиэ моһуогура сылдьыбыттаах эбит. Ол да буоллар, иниспиэктэрдэр эчэппит атаҕа, баҕар, моһуоктуо диэн хайдах буоларын кэтэһэн, туундараҕа хоммуттар.
Кытай устудьуона кыыс сарсыарда ама буолбутун эппит. Аны атаҕынан моһуогурбут кыыска учуонай Слепцов Сергей салайар иккис экспедицията эмиэ көмөҕө туруммутун эппиттэр.
Онон кыыс этэҥҥэ буолла диэн иниспиэктэрдэр оҥочолоругар олорон дьиэлэригэр төннүбүттэр. Сиргэ-дойдуга сылдьар киһиэхэ араас барыта буолуон сөп. Итинник бэйэ-бэйэҕэ көмөлөһүү хоту дойду олохтоохторун үгэһэ.
Женни Стрюкова, edersaas.ru