Кытай кыыһа Тымныы полюһун Кэрэ Куотунан буолуо дуо?

Бөлөххө киир:

Быйыл Өймөкөөн  улууһугар Тымныы полюһун бэстибээлэ 19-с төгүлүн  ыытыллар.

edersaas.ru, Елена ПОТОЦКАЯ,

19-с сылын ыытыллар киэҥ далааһыннаах тэрээһиҥҥэ  өрөспүүбүлүкэ  баһылыга аан бастакытын  кыттыыны ылыаҕа. Ил Дархан Айсен Николаев Өймөкөөҥҥө  туризм сайдыытыгар улахан болҕомтону уурар. Онон быйылгы бэстибээл улуус историятыгар олус улахан суолталаах.

Бэстибээл 2018 с. бастыҥ региональнай бырайыак буолан, «Хрустальный компас» национальнай бириэмийэҕэ тиксибитэ. Бэстибээл сүрүн  дьоруойа Чысхаан Тымныы хаһаайынын быһыытынан Саха сирин брендинэн буолла.

Улуустааҕы култуура управлениетын салайааччыта Аксинья Сивцева иһитиннэрбитинэн, тэрийээччилэр быйыл туристарга анаан «Тымныы полюһун Өймөкөөнү төһө  билэҕин?» диэн квест-оонньууну ыытан, дьон болҕомтотун тардыахтара.

Бэстибээлгэ Францияттан, Таилантан, Чехияттан, Японияттан, Кытайтан туристар кэллилэр. «Тымныы полюһун Кэрэ Куота» куонкуруска өрөспүүбүлүкэ араас улуустарын тэҥэ, Кытайтан икки кырасаабысса кыттара былааннанар. Онон тэрээһин норуоттар икки ардыларынааҕы таһымнанна.

Елена ПОТОЦКАЯ, edersaas.ru

Хаартыска интэриниэттэн туһанылынна.

+1
0
+1
0
+1
0
+1
0
+1
0
+1
0
+1
0