Сүрүн

Кытаанахха саҥа оскуола-уһуйаан үлэҕэ киирдэ

Чурапчы улууһугар Кытаанахха В.С.Яковлев — Далан аатынан саҥа оскуола-уһуйаан аанын аста. Саҥа тутуу 90/25 миэстэлээх.

Ил Дархан Айсен Николаев олохтоохтору үөрүүлээх күннэринэн эҕэрдэлээтэ уонна кыһа дириэктэригэр дохсун ытыс тыаһыгар доҕуһуоллатан, оптуобус ыларга сэртипикээт туттарда.
«Манна оскуола-уһуйаан тутуллан бүтэн үлэҕэ киирэрин бары тулуйбакка-тэһийбэккэ күүппүппүт. Бүгүн, дьэ, үөрүүлээх быһыы-майгы буолла, саҥа тутуу дьэндэйдэ, үлэҕэ киллэрилиннэ. Чугастааҕы күннэргэ манна үөрэх, дьарык саҕаланыа. Бу мин булгуччулаах ирдэбилим этэ«, — диир Ил Дархан Айсен Николаев.
Ил Дархан 2016 сыллаахха оскуолаҕа баһаар буолуоҕуттан, оҕолор баччааҥҥа диэри үс дьиэнэн үөрэнэ сылдьалларын бэлиэтээтэ. Интэринээтинэн, олорор дьиэнэн уонна оҕо айымньытын дьиэтинэн үөрэннилэр. Уһуйаан эмиэ саахалланар туруктаах дьиэҕэ баар.
«Кытаанахха оскуола-уһуйааны тутуу «Тыа сирин кэлим сайыннарыы» федеральнай бырагыраамаҕа киллэриллибитэ. Өрөспүүбүлүкэҕэ бу бырагырааманан аныгы социальнай тутуулар ыытыллаллар. Бу үлэ, биллэн турар, салҕанар. Оскуолаҕа уонна уһуйааҥҥа оҕолору үөрэтэргэ уонна дэгиттэр сайыннарарга бары усулуобуйа тэрилиннэ«, — диэн бэлиэтиир Ил Дархан.
Уопсайа 1 500 кв. м иэннээх, икки мэндиэмэннээх оскуола-уһуйааҥҥа кылаастар уонна кырачааннар сылдьар бөлөхтөрүн таһынан, успуорт саалата, тириэньэрдэр, мэдиссиинэ, учууталлар хосторо, иһитиннэрэн, көрдөрөн үөрэтэргэ анал тэриллээх хос, эбиэттиир саала уонна буфет, о.д.а. тэриллибиттэр. Доруобуйаларынан хааччахтаах оҕолор мэндиэмэннэр икки ардыларыгар сылдьалларыгар анал таһаарар сирдээхтэр.
Оскуола саҥа дьиэтигэр биир симиэнэҕэ 87 оҕо үөрэниэ, «Ньургуйаана» уһуйааҥҥа 30 оҕо сылдьыа.
СӨ Ил Дархан уонна Бырабыыталыстыба пресс-сулууспатын иһитиннэриититтэн тылбаас
Хаартыскаларга Андрей Сорокин (СИА) түһэриилэрэ.
0
0
Telegram @edersaas20