Бүгүн Дьокуускайга IT-пааркаҕа «Точка кипения» былаһааккаҕа лиидэр-кыргыттар пуорумнара буолан ааста.
edersaas.ru
Манна өрөспүүбүлүкэ 16 улууһуттан 200-тэн тахса уопсастыбаннай олоххо көхтөөх кыргыттар, эдэр дьахталлар кэлэн кыттыыны ыллылар.
Айталина Пономарёва Чурапчы Кытаанаҕыттан дьүөгэлэрин кытта сэттиэ буолан сиэттиспитинэн кэлэн кытыннылар. Кинилэр батсаапка кэлбит иһитиннэриини ааҕан баран, хайаан да киин куоракка кэлэргэ санаммыттар. Онон кыргыттар Чурапчыттан анал дэлэгээссийэ таһынан, бэйэлэрин баҕа өттүнэн, суол баарын туһанан, үөлээннээхтэрин кытта билсэн, санаа атастаһан бардылар.
Эдэркээн уопсастабанньык дьахталлар араас эйгэҕэ үлэлииллэр: ким эмчит, ким учуутал, ким култуура, ким тыа хаһаайыстыбатын үлэһитэ. Бары нэһилиэктэригэр араас уопсастыбаннай түмсүүлэри салайаллар эбит. Айталина тыа сиригэр олорор олоххо көхтөөх кыргыттары, эдэр дьахталлары маннык тэрээһиннэр олус өйүүллэр, саҥа сүүрээни олоххо киллэрэргэ көҕүлүүллэр диэн санаатын үллэстэр.
Кэрэхсэбиллээҕэ баар, бу суолталаах тэрээһиҥҥэ миниистирдэр, дьокутааттар, өрөспүүбүлүкэҕэ биллэр-көстөр урбаанньыттар кыттыыны ыллылар.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа уонна видеоҕа ааптар түһэриитэ уонна устуута.