Чурапчы улууһун Кытаанах нэһилиэгэр саха норуодунай суруйааччытыгар, П.А. Ойуунускай аатынан судаарыстыбаннай бириэмийэ лауреатыгар, педагогическай наука хандьыдаатыгар, Духуобунас академиятын академигар Василий Семенович Яковлев-Далаҥҥа анаан төрөөбүт Быһыттаах алааһыгар пааматынньык туруордулар.
Маны сэргэ Кытаанахтан төрүттээх саха биллэр живописеһыгар, Саха АССР ускуустубатын үтүөлээх диэйэтэлигэр Афанасий Петрович Собакиҥҥа Быйакый алааска пааматынньык баар буолла.
Чурапчы улууһугар биллэр-көстөр биир дойдулаахтарын ааттарын үйэтитиигэ былааннаах үлэ ыытыллар. Бу былаан олоххо киирэрин туһуттан былырыын Нерюнгриттан улахан таастары сакаастаан аҕалтарбыттара.
Пааматынньыктары арыйар үөрүүлээх тэрээһиҥҥэ СӨ Култуурунай наследиетын эбийиэктэрин харыстабылын департаменын салайааччы Николай Макаров, СӨ Ытык сүбэтин чилиэнэ, 2002-2008 сс. улууска баһылыктаабыт Иннокентий Аммосов, улуус баһылыгын социальнай боппуруостарга солбуйааччы Николай Аммосов, норуодунай суруйааччы, драматург, прозаик Василий Васильев-Харысхал, дизайнер Вячеслав Яроев кытыннылар.
Чурапчы улууһун дьаһалтатын пресс-сулууспата.