Саха сиригэр уһун кыһыҥҥа бэлэмнэнии үлэтин үгэнэ. Сүөһү иитиитигэр сүрүн сыал, кыстыгы этэҥҥэ туорааһын.
edersaas.ru
Алтынньы ыйдааҕы туругунан өрөспүүбүлүкэҕэ 419 тыһыынча гектар сир оттонно. Уопсайа, 452 тыһыынча туонна от бэлэмнэннэ, бу сыллааҕы былаан 96%-на.
Ойуур баһаардарыттан сылтаан 2259,25 туонна от умайда. Аммаҕа – 707,75, Тааттаҕа – 562,8, Чурапчыга – 266, Уус-Алдаҥҥа – 295,5, Горнайга – 127, Мэҥэ Хаҥаласка – 88, Томпоҕо – 20, Кэбээйигэ – 74, Намҥа – 118,2 туонна от. Ону таһынан, Эбээн Бытантай улууһугар кураантан сылтаан, кыһыны туоруур от кыайан булуллубакка турар. Икки сүүс туонна от тиийбэтэ.
Бэлиэтээн этэр буоллахха, тыа хаһаайыстыбатын тэрилтэлэрэ сыл ахсын от хасааһын бэлэмнииллэр. Бу сыл кураантан уонна баһаартан эмсэҕэлээбит тэрилтэлэргэ анаан Ньурба улууһа 2050, Хаҥалас –1920, Сунтаар – 1885,8, Бүлүү – 830 туонна оту уонна 150 туонна сенаһы, Үөһээ Бүлүү – 500, Кэбээйи – 165 туонна оту бэлэмнээтилэр.
СӨ Тыа хаһаайыстыбатын миниистирин солбуйааччы Николай Афанасьев быйыл соччо үүнүүтэ суох сайын буолбутун этэр. Ол түмүгэр, сүөһү аһылыгын бэлэмнээһиҥҥэ күчүмэҕэйдэр үөскээтилэр диир кини. Бүгүҥҥү туругунан, 24 620 туонна сиилэс, 12 248 туонна сенаж бэлэмнэннэ. Бу сыллааҕы былаан 76 %-на. Миниистири солбуйааччы, ойуур баһаардарыттан сылтаан аграрийдарга төһө да ыарахан кэм үүннэр, хомуур үлэтэ былааннаммытын курдук баран иһэр диэтэ.
Уопсайа, өрөспүүбүлүкэ үрдүнэн 9418 гектарга туораахтаах култуураны ыспыттара. Олортон 8955 гектар номнуо хомулунна.
Бүгүҥҥү күҥҥэ хортуоска хостоно сылдьар. Сыллааҕы былаан 90%-на туолара сабаҕаланар.
СӨ Тыа хаһаайыстыбатын пресс-сулууспата.