Төһө даҕаны күн-дьыл ыктар, оттооһун тохтообот, билигин даҕаны мобильнай биригээдэлэр үлэлии сылдьаллар.
edersaas.ru
Тыа хаһаайыстыбатын министиэристибэтин чахчытынан, балаҕан ыйын 16 күнүнээҕи туругунан, өрөспүүбүлүкэ үрдүнэн 365 356 туонна от чөкөтүллэн, сыл тахсар от 80 %-а хааччылынна. Маны таһынан 18 274 туонна сиилэс (былаан 68 %-а), 7 065 туонна сенаж (былаан 48 %-а) бэлэмнэннэ. Мобильнай биригээдэлэр 30 тыһ. туоннаны оттооннор, сорудахтарын 76 %-ын толордулар. Хаһаайыстыбалар билигин да оттуу, сүөһү сүмэһиннээх аһылыгын бэлэмнии сылдьаллар.
– Кыстыкка бэлэмнэнии ыстаастаах эрэсиим быһыытынан баран иһэр. Ойуур баһаарыттан эмсэҕэлээбит Горнай улууһун Атамай нэһилиэгэр окко 39 хаһаайыстыба сайаапкалаах, ол быһыытынан бу нэһилиэккэ 774 туонна от тиэйиллиэхтээх. Хомойуох иһин, отторун уокка былдьаппыт дьонтон иһитиннэрии атын улуустартан эмиэ киирэр. Ол эрээри биири бигэтик этиэххэ наада – көмө барыларыгар оҥоһуллуоҕа. Тиийбэт оту Амур, Магадан уобаластарыттан уонна Забайкалье кыраайыттан атыылаһыахпыт, Арассыыйа тыатын хаһаайыстыбатын министиэристибэтиттэн көмө кэтэһэбит, — диэн кэпсээтэ тыа хаһаайыстыбатын миниистирэ Александр Атласов бэҕэһээ «Саха» НКИХ араадьыйатыгар аһаҕас эпииригэр.
Раиса Сибирякова, «Саха сирэ» хаһыат, edersaas.ru