Сайыҥҥы өттүгэр курааннаан, күһүн уһуннук ардаан баран хаардаабыт буолан, сир мууһунан тоҥон, Мэҥэ Хаҥалас улууһугар сылгы хаһыыта уустугурда.
Кыстыкка киириэхтэн түөрт сылгы, ол иһигэр “Хорообут” ХЭУо-ҕа икки, Бырама уонна Чүүйэ нэһилиэктэригэр биирдии сылгы оҕутта. Ардай аһыылаах бөрө эмиэ кутталы үөскэттэ, ол курдук Чыамайыкыга атыырдаах биэни тарта, Лоомтукаҕа үс сылгыга саба түстэ.
Улуустааҕы бэтиринээринэй сулууспа иһитиннэрэринэн, билиҥҥи туругунан 1 тыһ. 663 сылгы, сүрүннээн убаһалар, эбии аһылыкка киллэриллибиттэр. Хаһыы уустугурбутунан исписэлиистэр сылгылары улаханнык быһа түһэ иликтэринэ эбии аһатарга сүбэлииллэр. Онуоха былаҕы, бэс мутукчатын итиэннэ күөл былыыгар концентрированнай аһылыгы уонна тууһу булкуйан туһанарга сүбэлииллэр. Тараҕай нэһилиэгин олохтооҕо, уопуттаах сылгыһыт Кузьма Бурнашев эбиэстээх, туустаах былыыгы сылгыларыгар мэлдьи сиэтэрин холобурдууллар.
Чахчыта даҕаны, өрөспүүбүлүкэтээҕи Агрохимыстаансыйа чинчийиитинэн илин эҥээр улуустар күөллэрин былыыктара минеральнай эттигинэн баайдар, сылгыны битэмиининэн хааччыйыыга көдьүүстээхтик туһаныллар кыахтаахтар.
—— Эбии аһылыкка бэтиринээринэй эмтиэкэлэргэ баар «Фелуцен» диэн минеральнай бирикиэти эмиэ туһаныахха сөп. Ону таһынан күһүн битэмиин укуолун ылбатах сылгылары битэмиинниир наада, — диир улуустааҕы бэтиринээринэй управление сүрүннүүр исписэлииһэ Николай Лукин.
Раиса Сибирякова, “Саха сирэ” хаһыат, edersaas.ru.