Кыстык: Орто Халымаҕа халыҥ хаар сылгы хаһыытыгар күчүмэҕэйдэри үөскэтэр

Бас билии көрүҥүттэн тутулуга суох, өрөспүүбүлүкэ үрдүнэн кыстыгы көрсө 471 тыһ. 167 т от соҕотуопкаламмытыттан, билиҥҥи туругунан 332 тыһ. т (70,5 %) от, маны таһынан 3,5 тыһ. т сенаж, 9,5 тыһ. сиилэс, 3,4 т концентрированнай аһылык, 762 т сылгы бурдуга баар.

edersaas.ru

Атын улуустарга кыстык этэҥҥэ баран иһэр буоллаҕына, Орто Халымаҕа уонна Абыйга балаһыанньа судургута суох. Бастатан туран, былырыын түспүт халыҥ хаар тэбиитигэр мэччирэҥ сирдэр уонна ходуһалар ууга барбыттарын түмүгэр, оттооһун бэрт уустук быһыыга-майгыга барбыта. Олохтоох дьаһалталар мобильнай биригээдэлэри тэрийэннэр, Орто Халыма улууһун Ойуһардаах, Эбээх уонна Налимскай нэһилиэктэригэр 7,4 тыһ. т, халаантан ордук улаханнык эмсэҕэлээбит Сыбаатайга уонна Арҕахтаахха 1,1 тыһ. т от бэлэмнэммитэ. Күн бүгүҥҥү туругунан улууска 5 тыһ. 928 т от баар. Иккиһинэн, быйыл эмиэ хаар халыҥнык түспүтэ сылгы хаһыытыгар күчүмэҕэйдэри үөскэттэ.

— Оту тиэйии-таһыы ороскуотун сорох чааһын толуйарга бүддьүөттэн үп көрүллүөҕэ, — диир тыа хаһаайыстыбатын уонна ас-үөл бэлиитикэтин миниистирин солбуйааччы Афанасий Семенов. — Ол курдук, Орто Халымаҕа улуус иһинэн 1 тыһ. 151 т от тиэйиллиэхтээҕиттэн 530 туонна тиэрдилиннэ. Биһиги кыстык хаамыытын билсэ, ханна наада сиригэр суһал дьаһаллары ыла олоробут.

Раиса Сибирякова, “Саха сирэ” хаһыат, edersaas.ru.