Өҥ сирдээх-уоттаах Нам улууһун Үөдэйин олохтоохторо сүөһүнү-сылгыны хото ииттэллэр.
edersaas.ru
Таһаарыылаахтык үлэлиир хаһаайыстыбалар кэккэлэригэр «Ымыйах» бааһынай хаһаайыстыбата инники күөҥҥэ сылдьар. Бу хаһаайыстыбаны ааспыт сылларга өрөспүүбүлүкэ таһымнаах салайар үлэҕэ сылдьыбыт, сопхуос дириэктэринэн, тыа хаһаайыстыбатын миниистирин солбуйааччытынан үлэлээбит, «Россельхознадзор» Саха сиринээҕи салаатын салайбыт Александр Ядреев бочуоттаах сынньалаҥҥа тахсан баран, дойдутугар олохсуйан, бииргэ төрөөбүттэрин түмэн, 2010 сыллаахха тэриммит.
“Ымыйах” сүүрүүк сылгыларга анаан тутуллубут көньүүһүнэни хотон оҥостубута эргэ да буоллар, олус айгыраабыт көрүҥэ суох, өссө да барбахтаһар көрүҥнээх хотон эбит. Уһаты-туора тардыллыбыт турбаларынан көрдөххө, ынахтарын УД-8 аппараатынан ыыр быһыылаахтар. Быйылгы кыстыкка 98 сүөһүнү, ол иһигэр 37 ыанар ынаҕы киллэрбиттэр. Кыбыыларыгар от толору.
— Бу суол аһыллыар диэри сиир оппут, — диэн быһаарар Александр Николаевич. — Сүрүн оппут арыыга баар. Сайын ахсын бэйэбит ыанньыктарбытыгар нэһилиэнньэттэн эбии ынах хомуйан, барыта сүүс ынаҕы Мохсоҕоллоох сайылыгар таһааран ыыбыт. Онон ыам ыйын саҕаланыаҕыттан балаҕан ыйын 15 күнүгэр диэри сүүрбэччэ ыал буолан тутуспутунан сайылыкка олоробут. Быйыл тэриллибиппит уон сылын бэлиэтээбиппит. Дьон сүөһүтүн сайын биһиэхэ биэрэн ыаталларын олус сөбүлээтилэр, өссө кыһын кытары көрдөрүөхтэрин баҕараллар эрээри, бииринэн, хотоммут эппиэттээбэт, иккиһинэн, бэйэбит сүөһүбүтүн чөкө тутарбытын астынабыт. Бастакы сылбытыгар “Эрэл” кэпэрэтиипкэ 47 туонна үүтү соҕотуопкалаабыт буоллахпытына, билигин 170 туоннаны туттарабыт. Ынах ахсыттан 1700 киилэ үүтү ыыбыт.
— Хас үлэһиттээххитий?
—— Үлэһит диэн биһиэхэ суох, ол тастан наймыламмыт киһи буоллаҕа. Бииргэ төрөөбүттэр, Дьоруой Ийэ оҕолоро, кыттыспыт буоламмыт, сүөһүбүтүн бэйэбит көрөбүт-истэбит, оппутун эмиэ бары саба түһэн оттуубут. Үүтү эрэ туттарабыт, оттон этинэн оҕолорбутун-урууларбытын хааччыйабыт. Ити курдук, улахан иэскэ-күүскэ киирбэккэ, бэйэбит кыахпыт иһинэн үлэлиибит.
Раиса Сибирякова, «Саха сирэ» хаһыат, edersaas.ru