Өрөспүүбүлүкэ үрдүнэн чааһынай дьиэлэри киин ититэр ситимҥэ холбооһун күүскэ ыытыллар. Быйыл Бүлүү улууһун 567 нэһилиэнньэлээх Кыргыдайыгар бу хайысхаҕа киэҥ далааһыннаах үлэ ыытыллан, барыта 91 дьиэ киин ититэр ситимҥэ холбонно.
Санатар буолахха, Кыргыдай бөһүөлэгэ улуус кииниттэн 135 км ыраах сытар. Аны туран, улуус үрдүнэн саамай элбэх сүөһүлээҕинэн биллэр. Тупсарыы сылыгар дьиэлэри киин ититиигэ холбуурга анаммыт хас да сыллаах былаан үмүрүйдэ.
Нэһилиэк баһылыга Семен Григорьев: “Үс сыллаах үлэбит түмүгүнэн 11 км уһуннаах ититэр ситими тартыбыт. Маны олоххо киллэрэргэ дьаһалта бүддьүөтүттэн сыл аайы 1-дии мөл солк. көрбүппүт. Сылын аайы маһы кэрдии ыараан иһэр. Чугас эргин уокка отторго сөптөөх мас бүттэ даҕаны. Бэрт ыраах сиртэн тиэйэбит. Үс сыллаах үлэ түмүгүнэн 91 ыал дьиэлэрин киин хочуолунайтан сылыталларын ситистибит. Хапсыбакка хаалбыт ыаллар дьиэлэрин кэлэр өттүгэр киин ититэр ситимҥэ холбуохпут», – диэн кэпсээтэ.
Манна даҕатан эттэххэ
Кыргыдайга 2014 сыллаахха сайыҥҥы уу ситимэ тардыллан, ыаллар сайыннары дьиэлэригэр, оҕуруоттарыгар ууну дэлэйдик туһаналлар. Билигин 13 дьиэҕэ душ, туалет баар, сорохтор өссө автомат сууйар массыыналары туруорбуттар.
Хаартыскаҕа: Тыа сиригэр толору хааччыллыылаах дьиэ элбэх.