Норуодунай бэйиэт, Саха сирин Суруйааччыларын сойууһун бэрэссэдээтэлэ Наталья Харлампьева билиҥҥи буола турар быһыы-майгы туһунан бэйэтин санаатын үллэстэр:
— Арассыыйаҕа тас дойдулар билигин олус элбэх сааҥсыйалары, бобуулары, сааныылары анаатылар, онон инники кэскил туһугар долгуйбат буолар сатаммат. Бу дойдулар дьайыылара“тиистэрэ хотор” кыахтара суоҕуттан күүскэ абаралларыгар-кыһыйалларыгар маарынныыр – бэйэлэрин экэниэмикэлэригэр хоромньуну таһааран туран, араас сааҥсыйалары ылыналлар.
Былыр-былыргыттан икки чугастыы норуоттары утарыта туруортаабыттарын туһунан санаан көрдөххө, ханнык күүстэр итини баҕарбыттара өйдөнөр. Украина билиҥҥи бэрэсидьиэнэ Нобелевскай бириэмийэҕэ түһэриллибитин туһунан сонун киһини олус сөхтөрөр… Арҕааҥҥы дойдулар барытын түҥ-таҥ тутан, талбыттарынан дьаһайыахтарын баҕараллар.
Арассыыйа норуоттара бииргэ элбэх кыһалҕалары, ыарахаттары тулуйбуттара. Барытыгар иҥэн-тоҥон киирбэккэ эрэ, этиэххэ сөп: хараҥа күүстэр хайдах да албаһырбыттарын иһин, кырдьык уонна үтүө санаа син биир кыайыахтара.
Бэлэмнээтэ Ангелина Васильева, “Саха сирэ” хаһыат, edersaas.ru
Хаартыска: gazeta.ru