Өрөспүүбүлүкэтээҕи кырдьаҕастар, инбэлииттэр интэринээт-дьиэлэригэр куорат быраабатын, уокуруктарын бэрэстэбиитэллэрэ тиийэн, Саҥа дьылынан эҕэрдэлээтилэр.
Тымныы оҕонньор, Хаарчаана эҕэрдэтин сэргэ, Гагаринскай уокурук управлениетын салайааччы Руслан Платонов уонна мэрия үлэһитэ Мария Попова романс ыллаан иһитиннэрдилэр. Ону тэҥэ “Синегорье” вокальнай ансаамбыл уонна Гагаринскай уокурук эдэр талааннара ыллаан-туойан, үҥкүүлээн сэргэхситтилэр.
Куоракка биллэриллибит Үтүө санаа сылыгар “Добрые ручки” диэн аахсыйа ыытыллыбыта. Бу аахсыйа кыттыылаахтара тигэн бэлэмнээбит сылаас, оһуордаах-мандардаах үтүлүктэрин интэринээт олохтоохторугар бэлэхтээтилэр.
Татьяна Макарова, Өрөспүүбүлүкэтээҕи кырдьаҕастар, инбэлииттэр интэринээт-дьиэлэрин иитээччитэ:
—Үтүө санаа сылыгар биһиэхэ элбэх дьон, үлэ кэлэктииптэрэ кэлэн ыалдьыттаан барбыттара. Кинилэр кэнсиэртээн, бэлэх туттартаан, сэргэхситэн бараллар. Кырдьаҕастар маннык тэрээһиннэри олус сөбүлүүллэр. Биһиги интэринээппитигэр икки ансаамбыллаахпыт: дьахталлар уонна эр дьон тус-туспа ыллыыллар. Сотору кэминэн “Икки сулус” диэн куонкуруспутун ыытаары сылдьабыт. Манна кырдьаҕастар интэринээт үлэһиттэрин кытары дуэтынан ыллыахтаахтар, — диэн иһитиннэрдэ.
Ангелина Васильева, “Саха сирэ” хаһыат, edersaas.ru