Кырдьаҕастары көдьүүстээхтик эмтээһин саҥа кииннэри арыйыынан ситиһиллиэҕэ
Бүгүн Дьокуускайга “Гериатрия – инникигэ инвестициялар” регионнар икки ардыларынааҕы научнай-практическай кэмпириэнсийэ буолла.
edersaas.ru
Кэмпириэнсийэ кыттыылаахтарын Уһук Илиҥҥэ штаты таһынан кылаабынай гериатр-исписэлиис Ольга Татаринова эҕэрдэлээтэ уонна Уһук Илиҥҥи регионтан кэлбит ыалдьыттары билиһиннэрдэ.
Гериатрия хайысхатыгар медицинскэй көмөнү сайыннарыыга РФ субъектарын үлэлэрин сүрүннүүр федеральнай киин салайааччыта, медицинскэй наука кандидата Александр Розанов Арассыыйаҕа гериатрия сулууспатын үлэтин-хамнаһын уонна инники былааннарын билиһиннэрдэ:
— 2024 сылга диэри аҕам саастаахтары гериатрия сулууспаларыгар киллэрэн эмтээһин ахсаана элбии туруохтаах. Бу регионнарга гериатрия кииннэрин уонна отделениеларын тэрийиинэн ситиһиллиэхтээх. 2024 сылга диэри эмтэммит кырдьаҕастар ахсааннара кыччаабыта 85-160 тыһыынча киһиэхэ тэҥнэһиэхтээх. “Оччотугар биһиги ити сыыппараны 2024 сылга эрэ ситиһиэхтээхпит, онон билигин туга да гыныа суохха сөп” диэн саамай тарҕаммыт алҕас баар. Оннук буолуо суохтаах. Холобур, регионнарга 2020 сылга 130 тыһыынчаттан аҕыйаҕа суох киһи эмтэниэхтээх, 2024 сылга кыччаабыта 6615 куойка баар буолуохтаах.
Арассыыйаҕа гериатрия сулууспатын үлэтин көдьүүстээхтик олоххо киллэрэргэ биһиги эһиэхэ тустаах сүбэлэри-амалары биэриэхтээхпит, этиилэри киллэриэхтээхпит. Тоҕо диэтэххэ, бу – барыбыт уопсай сорукпут. Социальнай эйгэ үлэһиттэрэ суох эмиэ сатаммаппыт. Баар кыах 80 бырыһыана 70 уонна онтон үөһээ саастаахтарга ананыаҕа.
Биһиги уопсай үлэбит күлүүс звенотунан Иһитиннэрэр киин буолар. Туох баар иһитиннэриини бу киин хомуйар. Кинилэртэн кимиэхэ медицинскэй уонна социальнай көмө наадатын быһаарабыт, инники үлэбитин торумнуубут.
Регионнар бэйэлэрэ ыыппыт үлэлэрин туһунан кэккэ сылларга отчуоттуохтара. Онтон Саха Өрөспүүбүлүкэтэ уонна Магадан уобалаһа 2021 сылга отчуоттуохтара.
Геронтология Арассыыйатааҕы научнай-клиническэй киинин дириэктэрин наука үлэтигэр солбуйааччы, профессор Юлия Котовская кырдьаҕастарга сүрэх-тымыр ыарыыларын эмтээһиҥҥэ уустук уонна быһаарылла илик боппуруостарга тохтоото. Ону сэргэ эмиэ бу киин нейрогериатрияҕа лабораториятын сэбиэдиссэйэ, доцент Элен Мхитарян, уҥуох-былчыҥ систиэмэтин ыарыыларыгар лаборатория сэбиэдиссэйэ, профессор Анатолий Наумов дакылааттары оҥордулар.
Уһук Илиҥҥи регион кылаабынай гериатрдара суруналыыстар ыйытыыларыгар хоруйдаатылар уонна эбиэт кэннэ Дьокуускай куорат 1 №-дээх поликлиникатын уонна Өрөспүүбүлүкэтээҕи 3 №-дээх балыыһа гериатрияҕа кииннэригэр сырыттылар.
ЫСПЫРААПКА:
Саха Өрөспүүбүлэкэтигэр доруобуйа харыстабылын сүрүн ситиһиилэриттэн биирдэстэринэн олох уһунун 71,7 сааска диэри тириэрдии буолла. Бу УҺук Илиҥҥи региоҥҥа үчүгэй көрдөрүү. Өрөспүүбүлүкэҕэ төрөөһүн арыый элбэҕэ уонна Арассыыйа Федерациятын кытта тэҥнээтэххэ, нэһилиэнньэ өлүүтэ аҕыйаабыта бэлиэтэнэр.
Надежда ЕГОРОВА, “Саха сирэ”, edersaas.ru
Мария ВАСИЛЬЕВА түһэриилэрэ.