Биэс оҕо тапталлаах ийэтин, биир сиэн эйэҕэс эбээтин, эйэҕэс бэйэлээх Ольга Шеломованы күн аайы Өймөкөөн улууһун Төрүт нэһилиэгин сэттэ ытык кырдьаҕаһа, икки инбэлиитэ үөрэ-көтө көрсөр.
edersaas.ru
Ольга Шеломова 2016 сыллаахха нэһилиэккэ социальнай үлэһит штата көрүллүбүтүгэр, тута үлэҕэ киирэргэ сөбүлэспитэ. Бу иннинэ балыыһаҕа санитарканан, асчытынан үлэлии сылдьыбыт буолан, кырдьаҕас дьону, ыарыһахтары кытта чугастык алтыһарга үөрүйэх этэ. Кырдьаҕастар да, бэйэлэрин харахтарын далыгар улааппыт оҕолорун олус истиҥник ылыналлар. Барыларыгар биир тэҥник сылдьыбат буолан, кыраапыга күн өрүү-өрүү түбэһэр. Ытык кырдьаҕас: «Бүгүн Олям кэлэр күнэ» , — диэн кыыһа күлбүтүнэн кэлэрин бырааһынньык курдук кэтэһэр. Биэнсийэлэрэ кыра кээмэйдээх буолан, нэһилиэккэ оҕолордоох да буоллаллар, кырдьаҕастар социальнай көрүүгэ наадыйаллар.
— Мин кинилэргэ сүрүннээн сонуну кэпсии, санааларын истэ кэлэбин. Кэпсэтэрбит быыһыгар түннүк да сууйан ылабын, мас да кыстыы охсобун, уу да таһабын. Инньэ гынан сэһэргэһэр киһилээх буолан, кэпсээннэрэ баһаам. Киһи кырдьар сааһыгар дьону кытта кэпсэтиигэ наһаа наадыйар эбит. Урукку олохторун ахталлар, тэлэбиисэргэ көрбүт кэнсиэрдэрин, киинэлэрин ис хоһоонун үллэстэллэр.
Аны бэлиитиктэрэ диибин диэн. Хата аан дойдуга туох буола турарын кэпсээн, кинилэртэн бэрт үгүһү билэн тахсабын, — диэн күлэ-үөрэ кэпсиир Ольга Николаевна.
Социальнай үлэһит аҕатыгар Николай Никитиҥҥэ олуһун махтанар. Кыыһа кырдьаҕастарынан сүүрэр кэмигэр Николай Николаевич сиэннэрин кытта бодьуустаһар, көрө-истэр.
Ити курдук, күн солото суох сылдьар Төрүт кырдьаҕастарын кэтэһэр, суохтуур, өйүүр киһилэрэ Ольга Шеломова буолар.
Елена ПОТОЦКАЯ, «Саха сирэ» хаһыат, edersaas.ru
Хаартыска уонна видео — Анфиса Кривошапкина.