Кырдьаҕастар дьиэлэрин кирилиэһигэр киһи өлүүтүгэр буруйдаах харабыл сууттанна (ВИДЕО)

Бүгүн Дьокуускай куорат федеральнай суутугар Хаҥалас улууһун Покровскай куоратын олохтооҕор бириигэбэр тахсыбытын туһунан СӨ Борокуратууратын пресс-сулууспата иһитиннэрдэ.

https://edersaas.ru

Бу киһи РФ Холуобунай кодексатын 109-с ыст. 2-с чааһынан, ол эбэтэр, үлэтин эбээһинэстэрин сөптөөхтүк толорбокко, сэрэҕэ суохтан киһини өлүүгэ тиэрдиигэ буруйданна.

Суут быһаарбытынан, 2017 сыл тохсунньу 30 күнүгэр «Корунд» чааһынай харабыллыыр тэрилтэ уонна сууттанааччы дуогабар түһэрсибиттэр.

Олунньу 17 күнүгэр, сарсыарда 09.00 чааска бу харабыл Дьокуускайдааҕы Кырдьаҕастар уонна инбэлииттэр интернат-дьиэлэригэр суукканы супту дьуһуурунайдыы кэлбит. Маныаха үлэтин ирдэбиллэрин кэһэн, харабыллыыр эбийиэгин 18.00 чаас кэнниттэн кэрийэн көрө барбатах, таһырдьа туох буола турарын видеокамеранан кэтээн көрбөтөх, ону ааһан, суотабай төлөпүөнүнэн аралдьыйа олорбут, бэл диэтэр, утуйан ылбыт. Ону таһынан, киирэр ааны иһиттэн хатаан кэбиспит.

Харабыл ити дьайыыларын түмүгэр, 21.00 чаас кэнниттэн кэлбит ити интернат-дьиэ олохтооҕо иһирдьэ кыайан киирбэккэ, кирилиэскэ үлүйэн өлөөхтөөбүт.

Сууттанааччы буруйун толору билинэн, кини хадатаайыстыбатынан, суут дьыаланы ураты бэрээдэгинэн көрбүт.

Суут кинини 2 сылга көҥүлүн хааччахтыырга уурбут итиэннэ 2 сыл харабыллааһынынан дьарыктанар быраабын быспыт.

СӨ Борокуратууратын пресс-сулууспата:

— РФ Холуобунай кодексатын 56-с ыст. 1 чааһын ирдэбилинэн, көҥүлү быһыы курдук накаастабыл миэрэ туттуллар, өскөтүн сууттанааччы буруйу аан бастакытын оҥорбут уонна ыаратар өрүттэрдээх буоллаҕына. Оттон бу түбэлтэҕэ оннук ыаратар өрүттэри суут булбата.

Вера МАКАРОВА, «Саха сирэ» хаһыат, edersaas.ru

Ол хайдах этэй?

https://www.youtube.com/watch?v=m_eQdXsWYdE

Хаартыска уонна видео: интернеттэн.