Биэссэр-акушер пуунун арыйыы үөрүүлээх чааһыгар СӨ Бырабыыталыстыбатын Бэрэссэдээтэлин солбуйааччы Ольга Балабкина, СӨ Доруобуйа харыстабылын министиэристибэтин нэһилиэнньэҕэ мэдиссиинэ көмөтүн оҥорууну тэрийэр департамент салайааччыта Вера Тарасова, Дьокуускайдааҕы 3 №-дээх балыыһа кылаабынай бырааһа Светлана Давыдова кыттыыны ыллылар, эҕэрдэлэрин тиэртилэр.
Ольга Балабкина олохтоохтору уонна мэдиссиинэ үлэһиттэрин истиҥник эҕэрдэлээтэ:
—Былырыын Саҥа Табаҕаҕа амбулатория аһыллан үлэтин саҕалаабыта. Оттон бүгүн манна биэссэр-акушер пууна аанын арыйда. Олохтоохтор аны мантан инньэ мэдиссиинэ көмөтүн тупсарыллыбыт үчүгэй усулуобуйаҕа ылар кыахтаннылар. «Бу «Доруобуйа харыстабыла» национальнай бырайыак баар буолан кыалынна, — диэтэ Ольга Валерьевна.
Маннык биэссэр-акушер пууннара өрөспүүбүлүкэ улуустарыгар салгыы тутуллалларын, маны сэргэ, СӨ Ил Дархана Саха сиригэр Доруобуйа сылын биллэрбитин, Доруобуйа сыла киһиэхэ туһуланарын, хаачыстыбалаах мэдиссиинэ өҥөтө оҥоһуллуохтааҕын эттэ. Өрөспүүбүлүкэҕэ 2018 сылтан 33 биэссэр-акушер пууна уонна врачебнай амбулатория тутуллубутун, үлэҕэ киллэриллибитин бэлиэтээтэ.
—-Өрөспүүбүлүкэҕэ доруобуйа харыстабылын саҥатытыыга улахан соруктар туруоруллаллар. Тохсунньуга өссө биэс биэссэр-акушер пууна улуустарга аһыллыаҕа. Ону сэргэ, Доруобуйа сылын бастакы ыйын түмүктүү Верхоянскай улууһугар поликлиника үлэҕэ киирээри турар. Ил Дархан бары дьайыылара, миэрэлэрэ санитарнай-мэдиссиинискэй көмөлөр хаачыстыбалаах уонна кыаллымтыа буолалларыгар туһуланаллар, — диэтэ Ольга Балабкина.
Мария Васильева (СИА) хаартыскаҕа түһэриитэ