Маны аах Уопсастыба

Кырдьаҕас үөрэх кыһата үбүлүөйүгэр бэлэмнэнэр

Быйыл  Наука сылыгар   Бүлүүтээҕи педагогическай кэллиэскэ бэрт үгүс үлэ ыытылынна.

Ол курдук, ахсынньы ыйга   XV төгүлүн ыытыллар  науканан дьарыгырар эдэр чинчийээччилэр  “Инникигэ хардыы” диэн пуорумнара буолан ааста. Онно 33 орто анал үөрэх кыһатыттан  1290  ыччат кытынна. Биһиги кэллиэспит уопсай түмүгүнэн 3- үс бочуоттаах миэстэни ылла. Бу — улахан  ситиһии. Оҕолор үлэлэрэ үрдүктүк сыаналанан,  аан дойду, Арассыыйа таһымнаах научнай-практическай конференцияларга Москва, Санкт-Петербург куораттарга барыахтара.

Эһиил  ураты бэлиэ сыл. Ол курдук  кэллиэспит 100 сааһын туолуоҕа. Үбүлүөй тэрээһиннэрэ  2022-2023  үөрэх сылыгар  кулун тутарга ыытыллыахтара. Үөрэх, үлэ барыта ол чэрчитинэн барар.

 Бу күннэргэ кэллиэс бэйэтин үлэтин-хамнаһын туһунан өрөспүүбүлүкэ тэлэбиидэнньэтигэр «Саха » НКИХ уонна  «Тэтим” араадьыйаҕа  тахсан,  үгүс ахсааннаах выпускник, педагогическай общественность улахан сэҥээриитин ылла.  Кэллиэс дириэктэрэ Иван Алексеев  үөрэх кыһатын бүгүҥҥүтүн, инникигэ сыалын-соругун сырдатта.

Кинини кытары РФ үтүөлээх учуутала Евгений Алексеев, СӨ үөрэҕириитин туйгуна Елизавета  Прокопьева, информатика учуутала Надежда  Васильева, методист Светлана Иванова, техническэй дисциплиналары үөрэтэр преподаватель  Николай  Семенов кыттыыны ыллылар.

Ем. Ярославскай аатынан кыраайы үөрэтэр түмэлгэ педчеллендж «Көмүс чуораанын» Амма, Өлөөн, Эдьигээн, Дьааҥы улуустарыгар уонна Хатас орто оскуолатыгар туттарыы үөрүүлээх түгэнэ буолла.

Көрсүһүүнү музей сотруднига, тэрийэр үлэни иилиир-саҕалыыр салаа сэбиэдиссэйэ Октябрина Максимова  олус истиҥник ыытта. Тэрээһиҥҥэ    Өлөөнтөн Сугулаан бэрэссэдээтэлэ  Альгис Сергеев, Эдьигээнтэн Баахынай оскуолатын дириэктэрэ Айсен Шишигин, Верхоянскайтан нэһилиэнньэҕэ социальнай көмөнү оҥорор управление исписэлииһэ  Елена Слепцова, Хатас оскуолатыттан колледж выпускниктара педагогическай наука кандидата, нуучча тылын уонна литературатын учуутала     Оксана Гаврильева, алын кылаастар учууталлара  Аида Томская,   Саргылаана Саввинова, Айталина Острельдина кытыннылар.

Бу күн алын сүһүөх кылаастар учууталларын, детсаад саастаах оҕолор иитээччилэрин бэлэмниир уонна коррекционнай педагогика салаалара, сэбиэдиссэйдэр Назарова В.М., Максимова М.А., Прокопьева М.Н.,  “Ийэ  сыла- үтүө дьыала сыла” диэн аахсыйа биллэрэн,  Өлөөн, Дьааҥы, Эдьигээн улуустарыгар оҕону  уонна дьиэ кэргэни өйүүр кииннэргэ устудьуоннар бэлэх-баһыылкаларын  үөрүүлээх туттарыыта буолла.

Светлана МЫТНИК,

Бүлүүтээҕи педагогическай кэллиэс преподавателэ. 

0
0
Telegram @edersaas20