Тапталлаах Дьокуускайбыт төрөөбүт күнүгэр киһини кэрэхсэтэр бииртэн-биир сэргэх тэрээһин ыытылынна.
Өрүү буоларыныы, бу күн сарсыардаттан Кырдьаҕас куоракка быыстапка бастыҥа, атыы-тутуу талбыта тардылынна. Тэрээһини ырыа-тойук ситэрэн-хоторон биэрдэ.
Коллекционердар быыстапкаларыгар үгүс киһи сырытта. Манна былыргы иһиттэн-хомуостан саҕалаан, значоктарга, киэргэллэргэ, кинигэлэргэ тиийэ тардыллыбыт.
Муоматтан төрүттээх Антонина Строева бүгүн 2000-ҕа чугаһыыр значок арааһын дьоҥҥо-сэргэҕэ көрдөрө аҕалбыт.
—Оскуолаҕа үөрэнэ сылдьан соҕуруу куораттарга оҕолору кытары суруйсарым. Значоктары атастаһарбыт. Олор мунньуллан, сыыйа элбээбиттэрэ. Билигин барыта холбоон икки тыһыынча курдук буолла.
Бүгүн манна оҕоҕо аналлаах остуоруйалартан, октябренок, пионер, комсомол значоктарын, куораттар, оройуоннар, үлэҕэ-хамнаска аналлаахтары, устудьуоннар тутар этэрээттэригэр анаммыт значоктары, о.д.а. элбэҕи аҕаллым. Алпаабыт буукубаларынан, көрөргүт курдук, толору бааллар. Бүгүн олорунан Дьокуускай — 387 диэн суруйдум, — диэн кэпсээтэ.
Татьяна Шишигина, норуот маастара:
—Эбэм, ийэм иистэнньэҥнэр эбит. Мин өр сылларга оскуолаҕа үлэ уруогун учууталынан үлэлээбитим.
1970-с сыллартан иискэ туттуллар тэриллэри мунньуунан дьарыктаммытым. Дьоммуттан хаалбыт улахан массыыналар, кыптыыйдар бааллар. Аан бастаан мунньарбар анаан ылбыт массыынам 1960-с сыллаах. Маннык оонньуур массыыналары оччолорго дьоннор оҕолоругар ылан биэрэллэр этэ. Мас холбуйалаах. Дьиҥнээхтик тигэр. Хаппаҕа кытары баар. Кэлин пластмасс хоруопкалаахтар баар буола сылдьыбыттара эрээри, оҥорбот буолан хаалбыттара.
Билигин миэхэ оҕо иистэнэр оонньуур массыынатын 20-чэ арааһа мунньулунна. Улахан дьон иистэнэр Кытай, Германия массыыналара, о.д.а., барыта уончаҕа тиийдэ. Ону сэргэ, сувенир массыыналардаахпын.
Кыптыыйдарым 200-тэн таҕыстылар. 17-с, 18-с үйэтээҕилэртэн саҕалаан эбэм, ийэм туттубут кыптыыйдарыгар, аныгы үйэ киэннэригэр тиийэ бааллар. Дьиҥэр, кыптыыйы аналынан туттуохтаахпыт. Тириини, линолеуму, хордуоҥканы, кумааҕыны, боробулуоханы, бараан түүтүн, о.д.а. арааска туттуллар тус-туһунан аналлаахтар, — диэн сырдатта. Сэҥээрэн мунньар киһиэхэ дьон көмөлөһөрүн уонна биир интэриэстээхтэр атастаһалларын кэпсээтэ.
Сардаана БАСНАЕВА.
Ааптар хаартыскаларга түһэриитэ.