Кырдьаҕас эколог өр сыллаах үлэтин бар дьоно сыаналаата!

Ааптар: 
Бөлөххө киир:

Олунньу 8 күнүгэр «Саха сирин киэн туттуута – 2019» норуот бириэмийэтигэр финалга тахсыбыт биэс бастыҥ экологтан кыайыылааҕы быһаарыыга ыытыллыбыт түмүк түһүмэҕэр Амма улууһун олохтооҕо Иван Мохначевскай «Доброволец-эколог» номинация хаһаайына буолла!

edersaas.ru.

Кэлэр ыйга 90 сааһын туолар Иван Мохначевскай идэтийбит байыаннай, саппааска сылдьар подполковник. Мас олордуутунан 1952 с. дьарыктанар, бочуоттаах сынньалаҥҥа тахсыаҕыттан бу дьарыгын өссө күүһүрдүбүт, кэҥэппит ытык кырдьаҕас кэлиҥҥи кэккэ сылларга «Кыайыы ойуура: уопсастыбаннай сиргэ маһы олордуу» экологическай-патриотическай бырайыагынан Аммаҕа улахан хамсааһыны төрүттээтэ. Кырдьаҕас эколог өр сыллаах үлэтин бар дьоно сыаналаата, кини туһатыгар 8 тыһ. 749 киһи куоластаата!

Атын финалистарга куолас бэриллиитэ маннык буолла: саха народнай учуутала Михаил Алексеев аатынан Үөһээ Бүлүүтээҕи лиссиэй-интэринээт «Тоҥуочаан» эколого-туристическай лааҕырын салайааччы Сардаана Захароваҕа – 7 тыһ. 523, Дьокуускай куораты ырааһырдар сүүнэкий баҕалаах Антон Васильевка – 5 тыһ. 154, Усуйаана Хаһааччыйатыгар эдэр экологтар хамсааһыннарын салайсар Галина Гороховаҕа – 1 тыһ. 860, Таатта улууһугар дьиэ кэргэн экологическай лааҕырын үлэлэтэр Октислава Аргуноваҕа – 705.

Прокопий Бубякин, «Сахамедиа РИИХ» АУо бырайыактарын отделын таһаарааччы эрэдээктэрэ:

— «Доброволец-эколог» номинация кыайыылааҕын Иван Ивановиһы уонна финалистарбытын барыларын эҕэрдэлиибит. Бу күрэхтэһиигэ бары кыттыбыт итиэннэ кинилэр тустарыгар куоластаабыт дьоҥҥо махтанабыт. Санатан эттэххэ, «Саха сирин киэн туттуута – 2019» норуот бириэмийэтин «Сахамедиа» холдинг тэрийэн ыытар, бу холдинг иһигэр «Саха сирэ» уонна «Якутия» хаһыаттар, Саха иһитиннэрэр ааҕыныстыба итиэннэ «Эдэр саас», «Улуус медиа» сайтар киирэллэр. Саҥа куоластааһын «Норуот дипломата» номинациянан ыытыллыаҕа. Сайаапкалары хомуйуу олунньу 11 күнүттэн саҕаланар, кыттыы балаһыанньатын ити күн биллэриэхпит.

Раиса Сибирякова, «Саха сирэ» edersaas.ru.

+1
0
+1
0
+1
0
+1
0
+1
0
+1
0
+1
0