Саха сиригэр кырдьаҕаһы, инбэлиити көрө-харайа ылар дьиэ кэргэттэргэ хамнастарын үрдэттилэр. Бу иннинэ ый аайы 17,6 тыһ. солк. ылар буоллахтарына, билигин 1 тыһыынчанан үрдээн, 18 582 солк. тэҥнэстэ. Маны таһынан, кырдьаҕас биэнсийэтин 75%-нын биэрэр.
Ангелина Васильева, “Саха сирэ” хаһыат, edersaas.ru
Биир ыал иккиттэн ордук киһини ылыа суохтаах. Туспа хос аныахтаахтар, эбэтэр кырдьаҕас дьиэтигэр күҥҥэ хаста да тиийэн, көрүөхтээхтэр-истиэхтээхтэр. Маны социальнай отдел хонтуруоллуур.
Ирдэбил быһыытынан, аҥаардас хаалбыт, бэйэтин көрүнэр кыаҕа суох киһини, дьахтары — 55, эр киһини 60 сааһыттан ылар көҥүллэнэр. Ылар киһитэ ырааҕынан аймаҕа да буолуон сөп. Чуумпуну, дьиэ кэргэн сылаас эйгэтин сөбүлээччилэргэ бу саамай табыгастаах бырагыраама.
Хамнаһы үрдэтиини СӨ Үлэҕэ, социальнай сайдыыга министиэристибэтэ көҕүлээтэ.
Билигин өрөспүүбүлүкэҕэ 97 маннык дьиэ кэргэн 98 кырдьаҕаһы көрөн-истэн олорор. Кырдьаҕастар төрөөбүт дойдуларыттан тэйбэккэ, уопсай тэрилтэҕэ киирбэккэ, билэр ыалларыгар чугастыы хараллаллара быдан ордук. Министиэристибэ маннык ыаллар ахсааннарын 200-кэ тиэрдэр былааннаах. Тоҕо диэтэр, интэринээккэ биир киһиэхэ ыйдааҕы ороскуот 45-57 тыһ. солк. тэҥнэһэр. Онон интэринээттэри элбэппэккэ, кырдьаҕастары дьиэҕэ көрөр ыаллары элбэтэр соруктаахтар.
Ангелина Васильева, “Саха сирэ” хаһыат, edersaas.ru