Дьокуускайга Саха сирин муусукатын уонна фольклорун мусуойугар «Кырадаһын абылаҥа» диэн бэртээхэй быыстапка буола турар. Манна СӨ норуотун уус-уран оҥоһуктарын маастара Дария Козлова иистэнньэҥнэри уһуйбута 40 сылыгар анаан түмсүүтүн үлэлэрин билиһиннэрэр, сырдатар. Бу туһунан биһиэхэ тустаах мусуойтан иһитиннэрдилэр.
—Бу киһини эрэ манньытар, болҕомтону тардар бэртээхэй быыстапка кулун тутар 23 — 30 күннэригэр буолар. Онон сэҥээрээччилэр кэлэн астына, дуоһуйа көрүөххүтүн сөп, диэн ыҥыраллар.
Быыстапкаттан сиэттэрэн сырдаттахха, Дария Семеновна «Кырадаһын абылаҥа» диэн түмсүүтүн 2015 сыллаахха тохсунньу 22 күнүгэр тэрийбит. Түмсүү дьарыга СӨ Национальнай художественнай музейын «Комдрагмет» ГУТ быыстапкалыыр саалатыгар саҕаламмыт. Түмсүүгэ бочуоттаах сынньалаҥҥа олорор, иистэниэхтэрин баҕалаах ыал тапталлаах эбээлэрэ, күн күбэй ийэлэрэ сылдьаллар.
Дария Семеновна үлэлиир бырагыраамалаах, сыаллаах-соруктаах. Кини үөрэнээччилэрин бастаан утаа кыбытыылаах тигии ньыматыгар үөрэппит. Салгыы кэтэр таҥаска кыбытыы киллэрэр ньымаҕа, сукуна лоскуйдарыттан кыбытыылаах тигиинэн ат толору симэҕин тигэргэ уһуйбут. Билигин бу түмсүүгэ баҕалаахтар кэлэ, эбиллэ тураллар. Онон төрүт үгэһи сөргүтээччилэр, тарҕатааччылар элбээн иһэллэр.
Биһиги корр., «Саха сирэ» хаһыат, edersaas.ru
+1
+1
+1
+1
+1
+1
+1