Мүрүтээҕи (Уус Алдан улууһа) 17 №-дээх «Сардаана» оҕону сайыннарар кииҥҥэ «Умный взгляд на мусор» диэн улуустааҕы научнай-практическай кэмпириэнсийэ буолан ааста. Тэрээһиҥҥэ уһуйаан улахан уонна бэлэмнэнии бөлөҕүн оҕолоро кытыннылар.
Барыта тоҕус методическай холбоһуктан 14 кыайыылаах оҕо кэлэн күрэхтэстэ. Улахан бөлөхтөн алтыалар, бэлэмнэнии бөлөхтөн ахсыалар.
Ол курдук, оҕолор быраҕыллыбыт, туһаттан тахсыбыт матырыйаалтан араас сонун оҥоһуктары оҥорбуттар. Муусука үстүрүмүөнүн букатын 29 көрүҥүн, ону таһынан оонньуурдары, светильник, истиэнэҕэ ыйанар чаһы, таҥас, уо.д.а. туһалаах тэриллэри айбыттар. Кырачааннар ити оҥоһуктарын барытын дьүүллүүр сүбэҕэ уонна мустубут дьоҥҥо, кыттааччыларга бэрт өйдөнүмтүөтүк кэпсээтилэр.
Бэлэмнэнии бөлөххө “Мичил” оҕо саадын иитиллээччитэ Коля Бочкарев бастаата. Иккис миэстэни “Татыйык” (Тулуна) уһуйаан иитиллээччитэ Валерия Акимова ылла. “Мичил” уһуйаан бэлэмнэнии бөлөҕүн иитиллээччитэ Виолетта Семенова маҥнайгы миэстэлэннэ. Иккискэ “Тугутчаан” оҕо саадыттан Милана Ушницкая (Эһэлээх) таҕыста. Үһүс бириистээх миэстэҕэ “Мүрүчээнэ” уһуйаантан Айнар Аммосов уонна “Үрүччэ” уһуйаантан (Бээрийэ) Артем Атласов тигистилэр.
Түгэнинэн туһанан улуустааҕы үөрэх управлениетын оскуола иннинээҕи салаатын үлэһиттэригэр А.П.Алексееваҕа, Е.Н.Степановаҕа, Л.Н.Дьячковскаяҕа, улуустааҕы оҕо бибилэтиэкэтин сэбиэдиссэйигэр В.А.Портнягинаҕа, юннаттар станцияларын педагогтарыгар А.А.Винокуровка, улуустааҕы айылҕа харыстабылын иниспиэктэригэр Н.Н.Охлопковка, СӨ Айылҕа харыстабылын иниспиэктэригэр П.И.Егоровка дьүүллүүр сүбэҕэ үлэлээбиттэригэр, бэйэлэриттэн анал бэлэхтээх кэлэн күүс-көмө буолбуттарыгар махталбытын тиэрдэбит.
Биһиги корр., “Саха сирэ” хаһыат, edersaas.ru