Өрөспүүбүлүкэҕэ Аҕам саастаах дьон күнүгэр аналлаах декада тэрээһиннэрэ салҕаналлар.
edersaas.ru
Мэҥэ Хаҥалас улууһун Балыктаах орто оскуолатын иккис кылааһын үөрэнээччилэригэр «Айхал буоллун, туруу үлэһит киһиэхэ!» диэн кылаас чааһа тэрилиннэ. Декада чэрчитинэн ыытыллыбыт кылаас чааһыгар 47 сыл алын кылаас учууталынан үлэлээбит педагогическай үлэ бэтэрээнэ, Учууталлар учууталлара Марфа Харитонова ыалдьыттаата.
Марфа Петровна үөрэнээччилэргэ Балыктаах бөһүөлэк быһыытынан хайдах тэриллэн, күн бүгүҥҥэ диэри сайдан кэлбитин билиһиннэрдэ.
Салгыы оҕолор хос эбээлэрин, хос эһээлэрин киэҥник сырдатар дакылааттары оҥордулар. Ол курдук, Габышев Эрсан, Захаров Денис, Колесова Нарияна, Макарова Диана, Ноговицына Нарыйа, Осипова Амгаяна, Свинобоев Эрчим, Сотникова Айыллаана хос эбээлэринэн-эһээлэринэн киэн тутталларын кэпсээтилэр.
Кылаас салайааччыта Любовь Васильевна Кычкина оҕолорго ыыппыт сэргэх тэрээһинэ биһирэбили ылла. Тэрээһиннэрин Павел Габышев тылларыгар, Галина Шахурдина матыыбыгар «Балыктаах киэһэтэ» диэн күн бүгүҥҥэ диэри уостан түспэт ырыанан доҕуһуоллатан, аныгы тэтимнээх үҥкүүнэн үөрэ-көтө түмүктээтилэр.
Ньургуйаана СКРЯБИНА,«Саха сирэ» хаһыат, edersaas.ru саайтка анаан