Кырачааннар бу күннэргэ Ньургун Боотур туһунан кэпсэтэллэрэ, кэпсииллэрэ, олоҥхо бухатыырын уруһуйдууллара үксээтэ. Уолаттар сарсыарда саадтарыгар кэлээт, бухатыыр буола оонньообутунан баралларын, онно куһаҕаны, хара дьайы хайаан да кыайалларын, бултаан-алтаан оонньуур дьиэлэригэр кэлэллэрин туһунан төрөппүттэр киэн туттан, үөрэн кэпсииллэр.
Тоҕо диэтэххэ, Олоҥхо декадатын чэрчитинэн, Дьокуускай к. Саха сирин норуоттарын муусукаларын уонна фольклордарын мусуойун үлэһиттэрэ «Дьулуруйар Ньургун Боотур» мульипликационнай киинэни оҕо саадтарыгар көрдөрө сылдьаллар. Бүгүн мусуой үлэһиттэрэ Дьокуускай куоракка «Кустук» оҕо саадыгар нууччалыы, сахалыы тылынан алта бөлөх иитиллээччилэригэр көрдөрөн, оҕолору кытта кэпсэтэн, кырачааннар тугу ордук сэҥээрбиттэрин, сэргээбиттэрин, өйдөөбүттэрин ыйыталаһан кэлбиттэр. Ону сэргэ, маннык үөрүүгэ бүгүн Хаҥаласка Покровскай кырачааннара тиксибиттэр. Сарсын мусуой үлэһиттэрэ мульткиинэни көрдөрө Горнайга айанныыллар.
Манна да5атан эттэххэ, мульткиинэни устарга Россия уонна СӨ үтүөлээх артыыһа, Россия композитордарын Сойууһун чилиэнэ, биллиилээх пианистка, мусуой дириэктэрэ Аиза Решетникова көҕүлээбит. Онон мусуой кэлэктиибин бастакы холонуута 2009 сыллаахха нууччалыы тылынан тахсыбыт. 2012 сыллаахха англия, немец, кытай, корея, дьоппуон омук тылларыгар тылбаастаммыт. Норуот көрдөһүүтүнэн 2015 сыллаахха «Дьулуруйар Ньургун Боотур» мульткиинэ саҥата сахалыы сатараабыт.
Биһиги корр., «Саха сирэ» хаһыат, edersaas.ru
Хаартыскалар: Саха сирин норуоттарын муусукаларын уонна фольклордарын мусуойуттан