Кыраҕы харахтаах “Норуот хонтуруола”
Олох-дьаһах

Кыраҕы харахтаах “Норуот хонтуруола”

Мантан антах ЕСИА -ҕа регистрацияламмыт Саха сирин хас биирдии олохтооҕо баар кыһалҕаны ыйан “Норуот хонтуруола” тиһиккэ сурук ыытыан уонна www.sakha.gov.ru. бырабыыталыстыба сайтынан ол хайдах быһаарылларын кэтээн көрүөн сөп.

Роман Попов, “Саха сирэ” хаһыат, edersaas.ru


Күн бүгүн “Норуот хонтуруолун” үлэтигэр толорор былаас 15 уоргана, олохтоох салайыныы бары уорганнара, ГИБДД, Роспотребнадзор, үлэ иниспиэксийэтэ кыттыстылар. Мантан антах эппиэттээх биэдэмистибэлэр кэккэлэрэ сыыйа-баайа хаҥатыллыаҕа.

Бүгүҥҥү күҥҥэ Дьокуускай, Нерюнгри, Мирнэй куораттар, Булуҥ, Чурапчы улуустарын олохтоохторуттан сайаапкалар киирдилэр. Биир бастакынан киин куорат олохтооҕо коммунальнай хаһаайыстыба управлениетын каассата үлэ күнүгэр эрэ аана аһаҕас буоларын, ол үгүстэргэ табыгаһа суоҕун ыйбыт суруга киирбитэ. Сайаапканы ырытыһыы түмүгүнэн, мантан антах коммунальнай төлөбүрү аны субуота күн эмиэ төлүөххэ сөп буолла. Атын сайаапканан, кирдээх уу турбата тэстиитэ тохтотулунна. Дьокуускай олохтооҕо бэйэтин суругар бу туһунан управляющай хампаанньаҕа хаста да этэ сатаабыта, болҕомтоҕо ылыллыбатаҕын ыйбыт. Бу уонна да атын дьон эппит кыһалҕалара бары 10 хонук иһинэн быһаарылыннылар.

Ил Дархан, бырабыыталыстыба дьаһалтатын салайааччы Федор Борисов бэлиэтээбитинэн, киэҥ сирдээх-уоттаах өрөспүүбүлүкэҕэ маннык хардарыта сибээс баара улахан суолталаах. Ол инникитин муниципальнай былаастар үлэлэрин-хамнастарын хонтуруолга тутар биир ньыманан буолуоҕар эрэллээх.

“Норуот хонтуруолун” биир уратытынан, дьон-сэргэ суругунан быһаарыы түргэнник ылыллыыта буолар. Өскөтө, көннөрү суругу көрүүгэ 30 хонук бэриллэр эбит буоллаҕына, “Норуот хонтуруолун” сайаапкатынан быһаарыы 10 хонук иһинэн ылыныллыахтаах. Ити ордук суһал быһаарыыны эрэйэр боппуруостарга көдьүүстэниэҕэ. Онон сайаапкалаах киһи дьиэтигэр олорон ыйбыт кыһалҕата хайдах быһаарылларын кэтээн көрөр кыахтанар.

Маннык боростуой, табыгастаах ньыманан коммунальнай хаһаайыстыбаҕа, сибээс үлэтигэр, судаарыстыбаннай, муниципальнай өҥөлөрү электроннай көрүҥүнэн ылыыга, оҕо уһуйааннарын, балыыһалар, уопсастыбаннай тырааныспар үлэлэригэр баар тирээн турар кыһалҕалары быһаарсыахха сөп. Ону тэҥэ, социальнай эбийиэктэри, дьиэни-уоту тутуу хаачыстыбатыгар, ойууру көҥүлэ суох кэрдии, арыгыны кистээн атыылааһын, хоруупсуйа чахчыларынан, атыы-эргиэн, суол быраабылатын кэһии, куһаҕан суол-иис туһунан үҥсүү киллэриэххитин син.

Хас да сыллааҕыта арыллыбыт «OneClickYakutsk» ситим киин куоракка эрэ үлэлиир эбит буоллаҕына, “Норуот хонтуруола” ситим өрөспүүбүлүкэни бүтүннүүтүн хабар.

Роман ПОПОВ, “Саха сирэ” хаһыат, edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

шесть + 11 =