Кыра оскуолалар үөрэнээччилэригэр бородуукта оннугар харчынан биэриэхтэрэ дуо?
Бу күннэргэ сонуну тарҕатар киин ситимнэр дойду бэрэсидьиэнэ Владимир Путин аҕыйах үөрэнээччилээх оскуолаларга үөрэнэр дьиэ кэргэн оҕолоругар бородуукта наборун оннугар, итии аһылыкка харчы көрүөххүтүн сөп диэн иһитиннэрбитин суруйаллар.
Архангельскай уобалас губернатора Александр Цыбульскай социальнай боппуруос мунньаҕар, аҕыйах үөрэнээччилээх оскуола оҕолоро дьиэлэригэр аһыыллара ордук диэн санаатын эппит. Маныаха бэрэсидьиэн: “Миэстэтигэр бэйэҕит быһаараргыт ордук. Эһиги бородууктанан биэрэр буолбуккут” – диэн эрэгийиэннэр бэйэлэрэ быһаарар боппуруостара буоларын санаппыт. “Дьиэ кэргэҥҥэ бородууктаны тиэрдэргэ ким эрэ атыылаһыан, ким эрэ миэстэтигэр тиэрдиэн, ону ким эрэ харайыан, ким эрэ тиксэриэн, бу дьону барыларын хамнастыыр наада”, — диэн дойду баһылыга бэлиэтээбит. Ол оннугар харчынан толуйар ордук буолаарай, диэн эрэгийиэн бэйэтэ быһаарарыгар этии киллэрбит.
Ол эрээри, кистэл буолбатах, араас дьиэ кэргэн баар – сорох ыал оҕото сарсыарда аһаабат, сорох иһэр-аһыыр дьон оҕолоро баҕарбытын да иһин хам аччык үөрэнэрэ барарга күһэллэр. Маннык түгэҥҥэ оҕо барахсан оскуолаҕа тиийэн итии аһылыгынан үссэммитэ ордук курдук.
“Саха сирэ” хаһыат, edersaas.ru
Хаартыска: mel.fm