2020 сыл тохсунньутугар бэрэсидьиэн Владимир Путин алын сүһүөх кылаас оҕолорун итии аһылыгынан хааччыйар туһунан этии киллэрбитэ. Ол чэрчитинэн, бэлэмнээх оскуоллалар быйылгыттан, 2023 сылга дойду үрдүнэн бары оскуолалар кыра оҕолорго босхо итии аһылыгы тэрийиэхтээхтэр.
Саха сиригэр быйыл 1-4 кылаастарга үөрэнэр 62 350 оҕо босхо итии аһылыгынан хааччыллыахтара. Федеральнай бүддьүөттэн 419,8 мөлүйүөн солкуобай, олохтоох бүддьүөттэн 36,5 мөлүйүөн солкуобай көрүлүннэ.
Билиҥҥи туругунан, оҕолору аһатарга усулуобуйа оҥоһуллар. Маны тэрийэргэ элбэх үлэ эрэйиллэр: хас биирдии оскуолаҕа бородууктаны харайыы, тиэрдии, астааһын, анал тэрили, холодильнигктары туруоруу, менюну, оҕо аһыыр кэмин быһаарыы, төрөппүттэртэн сайаапкалары хомуйуу, үлэһиттэри бэлэмнээһин, санитарнай ирдэбиллэри тутуһуу, о.д.а.
Үөрэх управлениеларын дааннайдарына, өрөспүүбүлүкэҕэ 2019 сылга 1-11 кылаастарга 143 182 үөрэнээччи итии аһынан хааччыллыбыт, ол уопсай ахсаантан 98%-нын ылар. Ол иһигэр иккитэ итии аһынан 96 137 (65,8%) оҕо хааччыллыбыт.
Ангелина Васильева, “Саха сирэ” хаһыат, edersaas.ru