Үлэ төлөбүрүгэр судаарыстыба алын гарантиятын хааччыйбат тэрилтэлэр 100 тыһ. солк. диэри ыстараап төлүүр буолуохтара. Ол туһунан үлэ, социальнай сайдыы миниистирэ Александр Михеев иһитиннэрдэ.
Федеральнай сокуон эбэһээтэлистибэтин толорбот үлэни биэрээччини Үлэ инспекцията ыстарааптыыр бырааптаах. Быраабы кэһии түбэлтэтэ аан бастаан тахсыбыт буоллаҕына, тустаах дуоһунастаах киһи 10-20 тыһ. солк. ыстараап төлүүр. Оттон тэрилтэ буоллаҕына, ыстараап – 30-50 тыһ. солк. Иккистээн, үһүстээн быраабы кэһии таҕыстаҕына, ыстараап суумата үрдүүр: салайааччыга — 20-30 тыһ. солк., тэрилтэҕэ – 50-100 тыһ. солк.
Уһук Хоту оройуоннарыгар 1964 сылтан үлэ төлөбүрүн алын кээмэйин (МРОТ) таһынан оройуон коэффициена уонна хотугу эбилик эбиллэр. Онон Саха сиригэр олорор үлэһиттэргэ 1,4; 1,6; 1,7 уонна 2,0 кээмэйдээх оройуон коэффициеннара олохтоммуттара.
МРОТ кээмэйэ 2018 сыл тохсунньутуттан 38%, ыам ыйыттан өссө 17,6% үрдээбитэ. Онон хамнас алын кээмэйэ өрөспүүбүлүкэ бүддьүөтүттэн үбүлэнэр уонна саамай улахан, 80%-наах хотугу эбиликтээх үлэһиккэ 27 908 солк. (1,7, коэффициеннаах киин улуустарга) уонна 31 256 солк. (2,0 коэффициеннаах хотугу улуустарга) тэҥнэһэр.
Ол эрээри, миниистир этэринэн, тэрилтэ бас билиитин көрүҥүттэн уонна төһө хотугу эбилиги ыларыттан көрөн, МРОТ кээмэйэ араас буолар эбит. Холобур, Дьокуускайга толору хотугу эбиликтээх, 1,4 оройуоннай коэффициеннаах үлэһиттэргэ МРОТ 24 558,6 солк. тэҥнэһэр. Оттон оройуон коэффициена 1,4-тэн кыра буолуо суохтаах. Ол федеральнай сокуонунан мэктиэлэнэр.
СӨ бырабыыталыстыбата хамнаһы үрдэтиини тус хонтуруолугар ылбыта. Онон ханнык баҕарар үлэһит хамнаһа бу кээмэйтэн кыра буолуо суохтаах. Ити чааһынай тэрилтэлэргэ үлэлиир дьоҥҥо эмиэ сыһыаннаах. Ону хонтуруоллуурга бары улуустарга салаалардаах Өрөспүүбүлүкэтээҕи ыстаап тэриллибитэ. Ыстаабы бырабыыталыстыба бэрэссэдээтэлин солбуйааччы Алексей Дьячковскай быһаччы салайар. Өскөтүн хамнаһы үрдэтиэхтэрин баҕарбат буоллахтарына, бу ыстаапка үҥсүөххэ сөп.
8(4112) 42-03-92 уонна 8(4112) 34-09-36 нүөмэрдэргэ эрийэн, хамнаһы хойутаталларын, алын кээмэйтэн кыраны төлүүллэрин, о.д.а. кэһиилэр баалларын туһунан этиэххитин сөп. Үлэни биэрээччилэргэ 8(4112) 34-38-75 уонна 8 (4112) 42-58-93 нүөмэрдэр үлэлииллэр.
Ангелина Васильева, “Саха сирэ” хаһыат, edersaas.ru