«Биир ньыгыл Арассыыйа» cудаарыстыбаннай дуумаҕа сокуон бырайыагын киллэрдэ. Ол курдук кыра дохуоттан иэһи устан? киһини аһыыр харчыта суох хаалларыахтара суоҕа.
Сабаҕалаатахха, бырайыак балаҕан ыйын 1 күнүттэн олоххо киириэн сөп. Киһи төһө да иэстээх буоллаҕына, харчытын барытын устуохтара суоҕун туһунан «Биир ньыгыл Арассыыйа» генеральнай сэбиэтин сэкиритээрэ Андрей Турчак эттэ.
— Бу норуот дохуотун көмүскүүр баартыйа сүрүн хайысхата буолар. Кирэдьиит биэрээччи иэһин төнүннэрэригэр аны иэстээх киһини бүтэһик харчытын саралаан ылыахтара суоҕа, — диэн эбэн эттэ.
Бу туһунан Ил Түмэн дьарыктаах буолуу, социальнай көмүскэл уонна доруобуйа харыстабылыгар кэмитиэтин бэрэссэдээтэлэ Владимир Чичигинаров санаатын үллэһиннэ:
— Биһиги бу киирбит сокуон барылын өйүүбүт. Сокуон олоххо киирдэҕинэ, ыарахан балаһыанньаҕа түбэспит киһиэхэ бу сокуон олус туһалаах буолуоҕа.
Ульяна Захарова, edersaas.ru