Кыра дохуоттаах дьиэ кэргэҥҥэ көмөлөһөргө өрөспүүбүлүкэ бүддьүөтүттэн 412 мөл. солк тыырыллыаҕа

Соторутааҕыта РФ Бэрэсидьиэнэ Владимир Путин  8-тан 16-гар диэри саастаах оҕолордоох кыра дохуоттаах дьиэ кэргэҥҥэ көмө харчы бэриллиэхтээҕин туһунан ыйбыта.

Бүгүн  Саха сиригэр экэниэмикэ бигэ туруктаах буолуутугар аналлаах суһал ыстаап мунньаҕар Владимир Путин туруорбут сыалыгар өрөспүүбүлүкэ бүддьүөтүттэн 412 мөл. солк. көрүлүннэҕинэ,   РФ бүддьүөтүттэн ити сыалы толуйууга 6 млрд солк. тыырыллыахтааҕын туһунан иһитиннэрдилэр.

Тустаах төлөбүр эрэгийиэннээҕи тиийинэн олоруу кээмэйиттэн 50 %, 75 % уонна 100 % толору төлөнүллүөҕэ диэн СӨ үлэҕэ миниистирэ Елена Волкова иһитиннэрэр, тустаах көмө Биэнсийэ пуондатын нөҥүө оҥоһуллуоҕа.

Бүгүн Ил Дархан Айсен Николаев өрөспүүбүлүкэ экэнэмиичэскэй өттүнэн бигэ туруктаах буоларыгар аналлаах суһал ыстаап мунньаҕын ыытта. Онно СӨ экэниэмикэҕэ миниистирэ Майя Данилова  өрөспүүбүлүкэ бүддьүөтүттэн  элбэх оҕолоох дьиэ кэргэни өйүүргэ барыта 412 мөл солк. көрүллэрин иһитиннэрдэ.

«Бүгүн  тустаах мунньахха эбии миэрэлэр ылылыннылар. Санатар буоллахха, Айсен Николаев  ааспыт нэдиэлэҕэ  тустаах сыалга барыта 14,1 млрд солк. көрүллүөхтээҕин ыйбыта. Бүгүн 8-тан 16-гар диэри саастаах оҕолордоох дьиэ кэргэҥҥэ  өрөспүүбүлүкэ бүддьүөтүттэн  412 мөл солк. тыырыллыаҕа, оччоҕуна федеральнай киинтэн 6 млрд солк тыырыллара ситиһиллиэҕэ», — диэн быһаарда.

Ыйдааҕы көмө посуобуйа кээмэйэ 9,7 тыһ. солк. саҕалаан 23 тыһ. солк. диэри халбаҥныаҕа.