Хамнас алын кээмэйэ үрдээбитин тутуспатах тэрилтэлэр 30 000 – 100 000 солк., салайааччы 10 – 50 000 солк. тиийэ ыстарааптаныахтара. Ыам ыйын 1 күнүттэн Саха сиригэр чааһынай тэрилтэлэргэ алын хамнас 24558 солк., судаарыстыбаннайдарга оройуоннааҕы коэффициентан көрөн 27 000 -31 000 солк. тэҥнэстэ.
edersaas.ru
Үлэ иниспиэксийэтэ иһитиннэрэринэн, алын хамнаһы мэктиэлиир федеральнай сокуону тутуспат тэрилтэлэр эппиэтинэскэ тардыллыахтара. Өскөтүн үлэлиир тэрилтэҥ хамнаскын ити этиллибит алын кээмэйгэ диэри үрдэппэт түгэнигэр 42-03-92, 34-09-36 төлөпүөннэргэ эрийэн биллэриэххин сөп. Тэрилтэлэр хамнас төһө сөпкө ааҕыллыбытын чуолкайдаһар төлөпүөннэрэ: 34-38-75, 42-58-93.
Хамнас алын кээмэйэ үрдээбитэ биэнсийэҕэ туох да сыһыана суох эрээри, доруобуйа туругунан быстах кэмҥэ сатаан үлэлээбэт буолуу босуобуйатын, дьахтар оҕолоноругар бэриллэр төлөбүр сууматын ааҕарга быһаччы оруоллаах буолуоҕа.
Федеральнай сокуону олоххо киллэрэргэ 2018 с. өрөспүүбүлүкэҕэ 4 млрд. солк. онтон 2 668 мөл. Саха сирин бүддьүөтүттэн көрүлүннэ. Хамнас алын кээмэйин бары тэрилтэлэргэ тутуһалларын хонтуруоллуур Өрөспүүбүлүкэтээҕи штаб тэриллэн, салайааччынан бырабыыталыстыба бэрэссэдээтэлин солбуйааччы Алексей Дьячковскай ананна. Маннык штабтар 34 улууска барыларыгар аһыллан үлэлииллэр. Онон, ким эмит бырааба кэһиллибит, хамнаһа алын кээмэйгэ диэри үрдээбэтэх түгэнигэр ити штабтан ыйыталаһыан сөп.
Марианна Тыртыкова, «Саха сирэ», edersaas.ru