Псхическэй ыарыылаах төрөппүт чугас дьонун, оҕотун олохторугар кутталлааҕа биллэр суол. Оннук биллибэккэ сылдьан, алдьархайы оҥорон кэбиһиэхтэрин сөп.
Сунтаар улууһун борокуратуурата биир сэлиэнньэ баһылыгын сайабылыанньатынан сокуоннай сааһын ситэ илик оҕо быраабын тутуһууга бэрэбиэркэ ыытта. Бэрэбиэркэ кэмигэр биллибитинэн, бу оҕо психическэй ыарыылаах ийэтин кытта олорор эбит.
Оҕо кэпсээниттэн билбиттэринэн, ийэтинээн кыыһырсыбыттарыгар, ийэтэ улахан кыптыыйынан оҕотун охсо сыспыт. Ийэтин ити дьайыытыттан оҕо өлөрдүү куттаммыт.
Борокуратуура бэрэбиэркэтин матырыйаалларыгар олоҕуран, силиэстийэ уорганнара оҕо сокуоннай бэрэстэбиитэлигэр холуобунай дьыала тэрийбиттэр. РФ Холуобунай кодексатын 119-с ыст. 1 чааһынан, ол эбэтэр, өлөрөрүнэн суоһурҕаныы бэлиэтэ баарынан. Билигин силиэстийэ бара турар.
СӨ Борокуратууратын пресс-сулууспата иһитиннэрбитинэн, бу буруйу оҥорууга оскуола салалтата сокуоннай саастарын ситэ илик оҕолор дьыалаларыгар хамыыһыйаҕа, эпиэкэ уорганнарыгар ийэтэ психическэй ыарыылааҕынан сибээстээн, оҕо кутталлаах быһыыга-майгыга олорорун иһитиннэрэр-биллэрэр боломуочуйатын толорботоҕо төһүү буолбут.
Ону таһынан, бу үөрэх дьылыгар психологическай тестээһин бу кыыс улахан кутталга сылдьарын быһаарбытын үрдүнэн, оскуола эмиэ туох да миэрэ ылбатах.
Итинэн сибээстээн, Сунтаар улууһун борокуруора оскуола дириэктэрин уонна улуустааҕы үөрэх управлениетын начаалынньыгын ааттарыгар представление ыыппыт.
Санатар буоллахха, бу саас Дьокуускай куоракка психическэй ыарыылаах 38 саастаах дьахтар чыскынан 9 саастаах оҕотун бүттэтэ суох кэйгэллээн өлөрөн баран, тимир гараас анныгар кистээбитэ. Суут уурааҕынан, бу ийэ күһэлэҥ эмтээһиҥҥэ анаммыта.
Биһиги корр., «Саха сирэ» хаһыат, edersaas.ru
Хаартыска: интэриниэттэн.