Күнүү саҕа истиҥ сыһыаны алдьатар адьынат баар үһүө! Сорох дьон турар остуолбаҕа да күнүүлүүр ыарыылаах буолар. Ол кэнниттэн ханнык таптал кэлиэҕэй — хайдахтаах да иэйии уостар-өлөр буоллаҕа…
СӨ ИДьМ-тын пресс-сулууспата иһитиннэрбитинэн, Дьокуускай куорат полициятыгар балыыһаттан иһитиннэрии киирбит — сирэйэ дэлби көҕөрбүт-испит, кырбаммыт дьахтар киирбитин туһунан. Быраастар ол эчэйиилэрин «орто ыарахан» диэн быһаарбыттар.
Бу иһитиннэриини участковай боломуочунай бэрэбиэркэлээбит. Онно биллибитинэн, эр киһи буолуохсут ойоҕун «көссүүлэспиккин» диэн үөхпүтүттэн сылтаан кыыһырсыбыттар-этиспиттэр. Эрэ кыыһырбыт уоҕар дьахтарын хаста да сутуругунан сирэйгэ охсубут.
Бу Үөһээ Бүлүүттэн төрүттээх 36 саастаах уорбаланааччы урукку өттүгэр холуобунай эппиэккэ тардылла сылдьыбатах.
Бу чахчынан «Доруобуйаҕа орто ыарахан эмсэҕэлээһини оҥоруу» ыстатыйанан холуобунай дьыала тэриллибит. Кырбый, күнүүһүт эр 3 сылга диэри болдьоххо көҥүлэ быһыллыан сөп.
Биһиги корр., «Саха сирэ» хаһыат, edersaas.ru
Хаартыска: интэриниэттэн.