Атырдьах ыйын 22-25 күннэригэр Ижевскай куоракка Норуоттар икки ардыларынааҕы оҕолор инклюзивнай айар II Оонньуулара буолан ааста.
Бу бүтүн Арассыыйа үрдүнэн кэтэһиилээх улахан тэрээһин. Кини сыала-соруга – доруобуйаларыгар хааччахтаах дьон айар дьоҕурдарын, талааннарын киэҥ эйгэҕэ көрдөрүү, дьон кинилэри атын харахтарынан көрөллөрүн ситиһии.
Манна бэйэлэрин эрэгийиэннэригэр бастаабыт, салгыы тургутууну ааһан финалга тахсыбыт айар кэлэктииптэр мустан, күөн көрүстүлэр. Барыта 31 араас номинацияҕа үс тыһыынчаттан тахса оҕо кыттыбыт.
Саха сириттэн “Кынат” оҕолор инклюзивнай айар кэлэктииптэрэ кыттыыны ылла. Кинилэр “Театральное искусство” номинация “Муода театра” хос номинациятыгар “Эрэкэ-дьэрэкэ оҕолор” диэн кэлиэксийэнэн ситиһиилээхтик кыттан, кыайыы өрөгөйүн биллилэр.
Бу кэлэктиип кыттааччылара Оҕолор уонна обургу оҕолор доруобуйаларын туругун чөлүгэр түһэрэр өрөспүүбүлүкэтээҕи кииҥҥэ (Республиканский реабилитационный центр для детей и подростков с ограниченными возможностями здоровья) реабилитацияны ааһаллар, онон манна мустан, манна тэриллибиттэрэ. Салайааччылара – педагог-психологтар Д.Р. Айдарбаева, А.Д. Адамов.
Ижевскэйгэ буолан ааспыт II Оонньууларга кырачаан «Кынаттар» I истиэпэннээх дипломунан наҕараадаланнылар. Бу улахан ситиһии! Манна даҕатан эттэххэ, былырыын I Оонньууларга кынаттар “Ойуулуур-дьүһүннүүр искусство” номинацияҕа “Надежда” триптих-хартыынанан кыра бөлөххө II миэстэни ылан тураллар.
Салайааччы Динара Айдарбаева үөрүүтүн үллэһиннэ:
– Оонньуулар олох үрдүк таһымнаах бардылар. Биһигини аэропортка көрсөн, волонтер, куратор анаан, бэрткэ илдьэ сырыттылар. «ДерябинЪ» диэн отельга олортулар, күҥҥэ үстэ босхо аһаттылар. Култуурунай бырагыраамалара олус киэҥ.
“Театральное искусство” номинация финальнай көрүүтэ Судаарыстыбаннай национальнай тыйаатыр улахан сценатыгар буолла. Биһиги оҕолорбут, Ижевскэйгэ диэри төһө да өр айаннаан, сылайан тиийдэллэр, олус үчүгэйдик кытыннылар. Мин кинилэринэн киэн туттабын! Икки ыйтан ордук бэлэмнэммит сырабыт маннык ситиһиинэн түмүктэммититтэн олус астынныбыт!
“Эрэкэ-дьэрэкэ оҕолор” кэлиэксийэ күн сирин көрөрүгэр күүс-көмө буолбут Дьокуускайдааҕы технология уонна дизайн кэллиэһин уһуйааччыта Дарья Михайловна Ноговицынаҕа уонна “Якутюрье” маҕаһыын дириэктэрэ А.С. Назароваҕа, күрэххэ кыттар тэттик киинэни устубут видеограф Михаил Лазаревка, гримердар Сибэкки Светланаҕа, Том Викторияҕа, күүс-көмө буолбут бэйэбит Оҕолор уонна обургу оҕолор доруобуйаларын туругун чөлүгэр түһэрэр өрөспүүбүлүкэтээҕи кииммитигэр, СӨ Үлэҕэ уонна социальнай сайдыыга министиэристибэтигэр, СӨ тырааныспарга министиэристибэтигэр, «Харысхал” пуондаҕа, “Норд-транс” агентствоҕа, «Ректайм» ХЭТ, спонсордарбытыгар “Якутскэнерго” ПАО генеральнай дириэктэригэр А.А. Стручковка, “Саханефтегазсбыт” генеральнай дириэктэригэр В.Н. Лебедевка оҕолор уонна төрөппүттэр ааттарыттан дириҥ махталбытын тиэрдэбит.
«Саха сирэ», edersaas.ru анаан Мария РЕШЕТНИКОВА