Кылынан — «Сиинэ очуостара» көбүөр
Олох-дьаһах

Кылынан — «Сиинэ очуостара» көбүөр

Бу күннэргэ Горнай улууһун «Тиһилик» маастардар түмсүүлэрэ «Сиинэ очуостара» паннону сиэлтэн оҥорон, дьон дьүүлүгэр таһаардылар.

edersaas.ru

Түмсүү чилиэнэ, норуот маастара Татьяна Константинова-Аммосова үйэлээх үлэ туһунан бу курдук кэпсиир:

— Үлэбит ситэн-хотон тахсарыгар үгүс киһи санаата, өйөбүлэ биир күүс буолан түмүлүннэ. Ол курдук, кыл-сиэл хомулларыгар «Тиһилик»  маастардар түмсүүлэрин салайааччыта Марфа Петрова улуустааҕы култуура салаатын үлэһиттэринээн  улуус сылгыһыттарын, бааһынай хаһаайыстыбаларын кытта үлэлэспиттэрэ. 

Суолталаах куолаан үлэни  норуот маастара, педагогическай үлэ бэтэрээнэ Варвара Заровняева, дьүһүннүүр-ойуулуур ускуустуба маастара  Татьяна Константинова-Аммосова, кыл, сиэл үлэ абылаҥын билэргэ саҥа  хардыыны оҥорооччу, саҕалааччы маастардар Зинаида Кычкина, Софья Андреева, көмөлөһөөччүлэр  Евдокия Потапова, норуот маастара  Валентина Захарова,  Александр Константинов оҥордубут.

Панно сүрүн ойуутун интэриниэт ситимиттэн ылыллыбыт хаартысканан сирдэттибит.

Маастардар бэлиэтииллэринэн, сылгы сиэлин уонна кутуругун Үрдүк Айыылары кытта ситимнээн  Буор куту, Салгын куту уонна Ийэ куту холбуур ойууларыгар тутталлар.

Маннык үйэлээх оҥоһугу оҥорбут дьон санаата биир буоллаҕына, дириҥ ис хоһоонноох кыл көбүөр олох уратытык айыллан тахсар эбит.

Куолаан оҥоһугу бар дьоҥҥо силигэ ситтэҕинэ бүтэрэн баран көрдөрөллөр.

Ол курдук, көбүөрү Горнай  улууһун маастардара биир ый устата оҥордулар.

Горнай улууһун «Тиһилик»  маастардар түмсүүлэрэ Ийэ дойдуга бэриниилээх буолуу сылыгар биир дойдулаахтарыгар кылтан уонна сиэлтэн бэртээхэй көбүөрү бэлэх гынан утары ууннулар.

Елена ПОТОЦКАЯ, «Cаха сирэ» хаһыат, edersaas.ru

Хаартыска: «Тиһилик»  маастардар түмсүүлэрин архыыбыттан

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

15 − 13 =