Бүгүн сайтпыт «Инстаграм» социальнай ситимҥэ баар страницатыгар (@edersaas) «Күлүмнүүрү быысыпкалаан оҥордум» диэн ис хоһоонноох сурук кэллэ. Сурук ааптара — Мария Захарова «Туймаада» хаһыат эрэдээктэрин солбуйааччынан үлэлиир эбит, саха норуотун чулуу уолун, хаан аймаҕын мэтириэтин оҥорбутун туһунан маннык кэпсиир:
— Василий Васильевич Никифоров — Күлүмнүүр төрөөбүт норуотун уйгутун, сайдыытын, үөрэҕириитин, кэскилин туһугар турууласпыт, дьиҥ-чахчы патриотическай тыыннаах, норуот туһугар олорбут киһи. Кини элбэх оҕолоох улахан дьиэ кэргэҥҥэ төрөөбүтүнэн дириҥ силистээх, тымыр-сыдьаан ыччат дьонноох. Олортон биирдэстэрэ — Күлүмнүүр бииргэ төрөөбүт иккис убайа Ньукулай Никифоров мин хос-хос эһэм буолар. Онон мин В.В.Никифоров — Күлүмнүүр сиэн балтыта буолабын, кини курдук улуу киһи төрөөн-үөскээн ааспытынан киэн туттабын. Кини албаннаах аатыгар сүгүрүйэрим быһыытынан, Күлүмнүүр мэтириэтин быысыпкалаан үйэтиттим. Былырыын балтым уонна күтүөтүм Күлүмнүүр мэтириэтин уруһуйдаабыттара, аймах буоларбыт быһыытынан, хас биирдии ыалга сүдү киһибит мэтириэтэ баар буолуохтаах дии саныыбын.[vc_video link=»https://www.youtube.com/watch?v=yafokJwYKsY» title=»Мария үлэтэ:»]Мария балтыта Уйгулаана кэргэнинээн Иванныын уруһуйдаабыт мэтириэттэрэ
«Ордук дьүһүнү табарга уонна онно сөптөөх сабы таларга ыарырҕаттым. Аны саха классик суруйааччыларын мэтириэттэрин быысыпкалыырга холонуом», — диэн дьоруойбут кэпсээнин түмүктүүр. Мария быысыпканан төрүкү дьарыктанар. Күлүмнүүр мэтириэтин саҕалыырыгар, хаартысканы анал бырагыраамаҕа киллэрэн, схема оҥорбут эбит. Бу сыл тохсунньутуттан саҕалаан оҥорбут, үлэ кээмэйэ 45 х 56 см.
Айтана АММОСОВА, «Саха сирэ» хаһыат, https://edersaas.ru
Хаартыскалар уонна видео дьоруой архыыбыттан туһанылыннылар.